Image Link:
ပြီးခဲ့တဲ့ နှစ်ကုန်ခါနီးတုန်း က ဆေး သွားစစ်ခဲ့ရပါတယ်။ ဆေးစစ်ခ ကိုတော့ ရုံးနဲ့ ချိတ်ထားတဲ့ Insurance Company က အကုန်ကျ ခံပါတယ်။ ဘာတွေကို စစ်ရမယ်ဆိုတာ ကိုယ့်ရဲ့ အသက်နဲ့၊ ပြီးခဲ့တဲ့နှစ် ဆေးစစ်ပြီးသား ပေါ်မူတည်ပြီး လိုအပ်တာကို ဒီနှစ်မှာ ထပ်စစ်ရတာပါ။ ကျမတို့ ရုံးက တစ်နှစ်ကို တစ်ခါ စစ်ခိုင်းပြီး တချို့ရုံးတွေက တစ်နှစ်မှာ နှစ်ခါ ဆေးစစ်ခိုင်းတယ်လို့ ပြောတာ ကြားဖူးတယ်။ ကျမအတွက် ဂျပန်မှာ ဆေးစစ်ဖူးတာ ပထမဆုံး အကြိမ်ပါ။
*****
*****
မျက်လုံးစစ်ဖို့အတွက် ဆရာမလေးက ကျမကို “မျက်ကပ်မှန် တပ်သလား၊ မျက်မှန်တပ်သလား” လို့မေးပါတယ်။ ကျမက “မျက်ကပ်မှန် မတပ်ဘူး၊ မျက်မှန်တော့ ကွန်ပျူတာ သုံးရင် တပ်ပါတယ်” လို့ပြောတော့ “အခု ပါ လာရင် သွားယူပြီး တပ်ပါ” လို့ပြောပါတယ်။ ဒါနဲ့ ကျမလည်း အိတ်တွေ ထားတဲ့နေရာ ပြန်လာပြီး ပါလာတဲ့ မျက်မှန်အစုပ်လေး ထုတ်တပ်ရင်း သူ့ဆီ တစ်ခါ ပြန်ပြေးရပါတယ်။ မျက်မှန်တပ်ပြီးတော့မှ သူက မျက်လုံး စမ်းတဲ့ စက်ကလေးပေါ် မျက်နှာအပ်ခိုင်းရင်း အထဲက “ဂ”ငယ် ပုံစံမျိုးစုံကို ကြည့်ခိုင်းတော့တာပါပဲ။ အဲဒီ “ဂ” ငယ် ပုံစံမျိုးစုံ တွေကို မျက်စိ စစ်ဖူးသူတိုင်း သိကြမှာပါ။ ကျမ ကြည့်ခဲ့တဲ့ “ဂ”ငယ်တွေမှာ နံပါတ် ၁ ဂငယ်က အကြီးဆုံး ဖြစ်ပြီး ဒုတိယ စာလုံး ဆိုရင် နည်းနည်း သေး လာပါတယ်။ နောက်ပိုင်း နံပါတ် ကြီးလာလေ စာလုံးတွေက တဖြည်းဖြည်းနဲ့ သေး သေးလာတာပေါ့။ အဲဒီ ဆိုဒ်စုံ ဂငယ်ကြည့်ခိုင်းတော့မှ ကျမ မျက်လုံးတွေ မကောင်းတော့ဘူး ဆိုတာ ဘူးပေါ်သလိုပေါ်တာပါပဲ။
အစတုန်းက ကိုယ်ကိုကိုယ် ညာနေသေးတယ်။ မကောင်းပေမယ့် ဘယ်လောက်အထိ မကောင်းဘူးလည်း ဆိုတာ သိမှ မသိတာ။ အခု ဆရာမက ကြည့်ခိုင်းတဲ့ စက်ရဲ့ အပေါက်ကလေးက ချောင်းကြည့်ရတဲ့ ဂငယ်မှာ ကျမ မြင်ရတာဆိုလို့ နံပါတ် ၁ ဂငယ်ပဲ ရှိပြီး ကျန်တဲ့ ဂငယ်တွေက အပေါက် ဘယ်ဘက်ကို လှည့်နေမှန်း မသိလောက်အောင်ေ၀၀ါးနေတာပါပဲ။ ဆရာမက ကျမကို “ ဂ ငယ် ဘယ်ဘက် လှည့်နေလဲ မြင်ရလား” လို့မေးရင် ကျမ ဘာမှ မမြင်ရလို့ အဆင့် ၁ ကနေကို မတက်ပါဘူး။ သူလည်း “သေချာ ကြည့်ပါဦး” လို့ပြောပြီး ၂ ခါ ၃ ခါ ထပ်စစ်ပေမယ့် ဂငယ်ရဲ့ အဖွင့်ဘက်ကို မှန်အောင်မပြောနိုင်လို့ နောက်ဆုံး “မျက်လုံး မကောင်းဘူးပဲ” လို့ မှတ်ချက်ချပါတယ်။ မျက်လုံးပြီး နားစစ်တာတော့ အခြေအနေ ကောင်းတယ်။ မှန်လုံခန်းထဲမှာ နေရပြီး အသံတိုးတိုးလေး “တီ”လို့ ကြားရင် လက်ထဲမှာ ရှိတဲ့ ခလုပ်လေးကို နှိပ်လိုက်ယုံပဲ။ အသံတိုးတိုး သွားပေမယ့် အားလုံး ကြားရပါတယ်။ (တော်သေးတာပေါ့ .. ၀ူး..)
သွေးစစ်တာက သွေးစုပ်တဲ့ ဆရာမကြောင့် တော်တော်လေး ခံစားလိုက်ရတယ်။ လက်ထဲကို အပ်ကြီး စိုက်ရက်သားကနေ သွေးကြောရှာမတွေ့ပဲ ဟိုစမ်းဒီစမ်းနဲ့ လက်ကို အပ်နဲ့ မွှေ့နေတာ သွေးစုပ်တာ မနာပဲ သူအပ်နဲ့ မွှေ့လို့ အရမ်းနာပါတယ်။ ဆရာမက အသစ်မို့ထင်တယ်။ အကြောရှာတာ သိပ်မကျွမ်းကျင်ဘူး။ ပိန်လို့ အကြောတွေပေါ်နေတာ သူ့ကျမှ အကြောရှာမတွေ့ဘူးရယ်လို့။ လိုသလောက် သွေးစုပ်ထုတ်ပြီးတော့ ကျမလည်း တအားနာတာ ခပ်မျော့မျော့ပဲ ကျန်တယ်။ ဒါတောင် သတ္တိ အတော်ကောင်းတာနော်။ တစ်ချက်မှ သွေးစုပ်ထုတ်နေတာကို မကြည့်ဘူး။ မျက်နှာလေး အသာလွှဲထားရင်း လုပ်ချင်သလိုသာ လုပ်၊ ထုတ်ချင်သလိုသာ ထုတ်တော့လို့ သဘောထား လိုက်တော့တယ်။ အပ်စွဲထုတ်လိုက်တော့ သွေးတွေ ထပ်ထွက်လာတာ အများကြီးပဲ။ ဆရာမလည်း တောင်းပန်လိုက်တာ ပျာနေတာပဲ။ အပ်စိုက်တဲ့နေရာမှာ သွေးခြေဥနေတာ ရက်အတော်ကြာ ခံလိုက်ရတယ်။
ကျန်တာတွေက ဓာတ်မှန်ရိုက်တယ်။ ပြီးတော့ အမျိုးသမီးဆရာဝန်နဲ့ စမ်းသပ်ရတယ်။ ဆေးစစ်တာ ၇ မျိုးလောက်ရှိတော့ အသေးစိပ် ရေးမပြတော့ဘူး။ ဆေးစစ်ပြီး ထွက်လာတော့ အမျိုးသားက ဧည့်ကြိုကောင်တာမှာ စောင့်နေတာပါ။ ကျမကလည်း ဆေးစစ်ပြီးပြီးချင်း သူ့ကို “ကျန်တာတွေတော့ကိစ္စမရှိဘူး။ မျက်လုံးစစ်တာတော့ ကျမယ်ထင်တယ်” လို့ စောင့်ရတဲ့သူ အားရှိအောင်ပြောလိုက်ပါတယ်။ တကယ် ဆေးစစ်တဲ့အဖြေ သိရတော့လည်း မျက်လုံးပဲ ဆေးကျပါတယ်။
*****
အရင်တုန်းက မျက်မှန်တပ်ပေးမယ့် မျက်လုံးက ကြည့်ရတာ ၀ါးတားတားမို့ အမြင် သိပ်မကြည်လင်ပါဘူး။ မျက်မှန်အသစ်လည်း တပ်လိုက်ရော ကြည့်ရတာ ၀ါးတားတား မြင်ခဲ့သမျှ အရာအားလုံး ကြည်လင် ပြတ်သား နေတော့ စစ တပ်ချင်း မနေတတ်ဘူး။ မျက်မှန်အသစ်ရတဲ့နေ့က မျက်မှန်တပ်ပြီး Blog တွေ အတော်များများ လိုက်ဖတ်ဖြစ်ပါတယ်။ မျက်မှန်ဝယ်တုန်းက ရည်ရွယ်တာ စာမေးပွဲအတွက်ပါ။ မျက်မှန်တပ်ပြီး Blog ဖတ်တာ မြင်တော့ ကျမ အမျိုးသား ရင်ကျိုးပါတယ်။ စာဖတ်စေချင်လို့ မျက်မှန်အသစ် တစ်လက်ဝယ်ပေးတာလို့လည်း ပြောသေးတယ်။ အခုတော့ စာမေးပွဲလည်း တဆင့်ပြီးသွားတာမို့ မျက်မှန်လေး တပ်လျက် Blog ရေးပြီး ပို့စ်အသစ် တင်လိုက်ရပါတော့တယ်။
ဖေဖေါ်ဝါရီ ၂၃၊ ၂၀၀၉။
