November 29, 2010

သမီးဖတ်ဖို့(၂၀၀၉ ခုနှစ် စက်တင်ဘာ-အောက်တိုဘာ)

မေမေလည်း ပြီးခဲ့တဲ့တစ်ခေါက်တုန်းက ယောင်္ကျားလေး၊ မိန်းကလေး မသိခဲ့ရတော့ နောက်တစ်ခေါက် ဆိုရင်တော့ သိရလောက်တယ် ဆိုပြီး တစ်ပတ်နဲ့ တစ်ပတ် ဆေးရုံပြရမယ့် ရက်ကိုပဲ မျှော်နေမိတယ်။ မေမေတို့ မန်နေဂျာပြောတာတော့ ဒီက ဆရာဝန်တွေက ကိုယ်ဝန် ၅ လ မကျော်မချင်း ယောင်္ကျားလေး မိန်းကလေး ဆိုတာ မပြောကြဘူးနဲ့ တူတယ်တဲ့။ ကလေး ဖျက်ချပစ်မှာစိုးလို့ လို့ပြောတာပဲ။ တရုတ်ပြည်မှာတော့ ယောင်္ကျားလေး မဟုတ်ဘူးဆိုရင် ဖျက်ချပစ်တာတော့ ကြားဖူးတယ်။ ဒီမှာတော့ အဲဒီလို ဖျက်ချလို့ ရလား မရလား မေမေလည်း သေချာ မသိဘူး။

နောက်ပြီး ရှိသေးတယ်၊ ကိုယ်ဝန်ရှိခါစမှာ မအန်မပြုရင် ယောင်္ကျားလေးဖြစ်မယ်တို့၊ ultra sound ကြည့်လို့ မိန်းကလေးဆို နောက်ကျမှ သိရတယ်တို့၊ ကိုယ်ဝန်ဆောင်သည်ကို နောက်ကကြည့်ရင် ဗိုက်က ဘေးကို ကားမနေပဲ ရှေ့ကို ထွက်နေရင် ယောင်္ကျားလေးဖြစ်မယ်တို့၊ မိခင်လောင်းရဲ့ ဗိုက်မှာပေါ်တဲ့ အကြောင်းက ကွေးကောက်နေရင် မိန်းကလေးဖြစ်ရမယ်တို့ ပြောလိုက်ကြ၊ ခန့်မှန်းလိုက်ကြတာများ စုံနေတာပါပဲ။ နောက်ပြီး အမျိုးတွေကလည်း ပါပါးရဲ့ မွေးနေ့ရက်နဲ့ မေမေ့မွေးနေ့ရက်ကို တွက်ချက်ပြီး စုံ ဂဏန်းဆို မိန်းကလေး ဆိုလား၊ ယောင်္ကျားလေးဆိုလား မှတ်တောင် မမှတ်မိတော့ဘူး သူတို့ ပြောကြတာ။ နှစ်ဘက် အဘိုးအဘွားတွေက ယောင်္ကျားလေး လိုချင်တော့ မေမေတို့ကို တွက်ချက်ကြည့်ပေးပြီး စိတ်ကူးထဲကနေ ယောင်္ကျားလေး ဖြစ်မှာပဲ လို့ ကြိမ်းသေပေါက် တွက်ထားကြတယ်လေ။ အရာအားလုံးက ကံပါပဲ သမီးရယ်။ ဗိုက်ထဲက ကလေးက ယောင်္ကျားလေးလား၊ မိန်းကလေးလား ဆိုတာ သူ့ဟာသူ သတ်မှတ်ထားပြီးသားပါ။ ဘယ်သူကမှ ရွေးချယ်ပိုင်ခွင့်မရှိပါဘူး။ မေမေတို့အတွက်ကတော့ ဗိုက်ထဲက ကလေးလေးက နေကောင်းတယ်၊ ကျန်းမာတယ်၊ ကြီးထွားတာလည်း ပုံမှန်ပဲ ဆိုတာနဲ့တင် စိတ်အေးရပါပြီ။

ပြောမယ့်သာ ပြောရတာ။ မေမေလည်း ဗိုက်ထဲက ကလေးလေးက ယောင်္ကျားလေးလား၊ မိန်းကလေးလားဆိုတာ သိပ်သိချင်တာပဲ။ ဘာလို့လည်းဆိုတော့ စိတ်ထဲကနေ ကလေးနဲ့ စကားပြောတိုင်း “ကလေးရေ” လို့ပဲ ခေါ်နေရတော့ ယောင်္ကျားလေးဆိုလည်း “သား” လို့ ခေါ်ပြီး စကားပြောချင်တယ်၊ မိန်းကလေးဆိုလည်း “သမီး” လို့ ခေါ်ပြီး စကားပြောချင်နေမိတယ်။ ကလေးကလည်း မေမေနဲ့ စိတ်ချင်းဆက်နေတာဆိုတော့ တစ်ခါတလေ ငြိမ်နေရင် “ကလေးရေ.. ငြိမ်နေပါလား” လို့ စိတ်ထဲက ပြောလိုက်တာနဲ့ အထဲက သမီးလေးက “မငြိမ်ပါဘူး မေမေ” လို့ ပြောနေသလိုပဲ တွန်းထိုးပြီးကို လှုပ်ပြနေတော့တာ။ တစ်ခါတလေလည်း မေမေက ဗိုက်ပေါ် လက်တင်ထားမိရင် သမီးလေးက လက်အောက်နားလေးမှာ ခုံးခုံးလေး ကြွတက်လာပြန်ရော။ အဲဒီလို ကြွတက်လာရင် ဒါလေးက ခေါင်းလေးများဖြစ်မလား၊ ဒါလေးက တင်ပါးလေးများဖြစ်မလား ဆိုပြီး စမ်းကြည့်ရင်းက စိတ်ထဲလည်း ပီတိဖြစ်ရတယ်။ နောက်တစ်ခေါက် ဆေးရုံသွားရင်တော့ မိန်းကလေး ယောင်္ကျားလေး သိရလောက်ပြီလို့ တွေးမိပြီး မေမေလည်း ဆရာဝန်နဲ့ တွေ့ဖို့ကို စိတ်စောနေမိတယ်။

ကိုယ်ဝန် ၅ လကျော် ၆ လထဲ ၀င်လာပြီဆိုတော့ ဗိုက်လည်း သိသိသာသာကို ထွက်လာပြီလေ။ ရုံးကလူတွေက ဗိုက်ကို ကြည့်ပြီး “လေးလားတဲ့” မေမေ့ကို လာမေးကြသေးတယ်။ မေမေ့စိတ်ထဲတော့ လေးတယ်လို့လည်း မထင်မိပါဘူး။ ကလေးတိုးရင်ပဲဖြစ်ဖြစ် လှုပ်ရင်ပဲဖြစ်ဖြစ် တစ်ချက် တစ်ချက် တင်းပြီး ဗိုက်နာသလိုဖြစ်တာက လွဲရင် ကျန်တာတော့ ဘာမှ မဖြစ်လိုလှဘူး။ စက်တင်ဘာ ၁၂ ရက်နေ့ကတော့ မေမေ့ သွားတွေကို စစ်ဆေးဖို့ သွားဆေးခန်း သွားလိုက်သေးတယ်။ ကိုယ်ဝန်ဆောင်သည်တွေက ဟိုမုန်းအပြောင်းအလဲကြောင့် သွားဖုံး ရောင်ပြီး သွေးထွက်တာမျိုးတွေ ဖြစ်တတ်တယ်လို့ စာထဲလည်း ဖတ်လိုက်မိတယ်။ ပြီးတော့ ကိုယ်ဝန်လရင့်လာရင် သွားနှုတ်တာတို့၊ သွားပိုးစားလို့ သွားဖာတာမျိုးတွေ လုပ်လို့မရဘူး ဆိုပြီး ဒီပို့စ်လေး မှာ ရေးထားတာ ဖတ်မိလို့ မေမေလည်း စောစောစီးစီး သွားကို စစ်ဆေးပြီး သန့်ရှင်းရေး သွားလုပ်ထားလိုက်တယ်။ တော်ပါသေးတယ်။ မေမေ့ သွားတွေက အားလုံးကောင်းတယ်၊ သွားဖုံးရောင်တာ သွေးထွက်တာမျိုးတွေ မရှိဘူး။ သွားနဲ့ ပတ်သက်ပြီး အဲဒါလေး တခုတော့ ကံကောင်းတယ်ပြောရမယ်။

ဒီလိုနဲ့ စက်တင်ဘာ ၁၄ ရက် ဆေးရုံပြရမယ့်နေ့ ရောက်တော့ ဆရာဝန်က ထုံးစံအတိုင်း ဗိုက်ပေါ် ဂျယ်လီလို ခပ်ပြစ်ပြစ်အရည်တွေ လောင်းချလိုက်ပြီး ကလေးကို စပြီး စစ်တော့တာပဲ။ အရင်ဆုံး ခေါင်းအရွယ်တိုင်းယူတယ်။ ပြီးတော့ ကလေး အရပ်လေး တိုင်းပြီး အလေးချိန်တွက်ယူတယ် ထင်ရတာပဲ။ စက်နဲ့ လုပ်နေတာဆိုတော့ မေမေနဲ့ ပါပါးလည်း ဘေးကနေပဲ ကြည့်နေရတာပေါ့။ အဲဒီနေ့က ကိုယ်ဝန် ၂၃ ပတ်နဲ့ ၁ ရက်ရှိနေတဲ့ သမီးလေးရဲ့ ကိုယ်အလေးချိန်က ၆၅၆ ဂရမ်ရှိလာပြီး နှလုံးခုန်တာလေးတွေ၊ အစာအိမ်၊ ဆီးအိမ်၊ မျက်လုံး၊ လက်၊ ခြေထောက်လေးတွေ၊ ကြောရိုး နဲ့ လည်ပင်းတွေပါ မြင်နေရပြီ။ အဲဒါတွေ ကြည့်ပြီးတော့ ဆရာဝန်က “အားလုံး ကောင်းတယ်” လို့ ပြောပြီး ပြန်တော့မယ် လုပ်ရော။ အဲဒီတော့ မေမေက “ယောင်္ကျားလေး မိန်းကလေး သိရပြီလား” လို့ ဆရာဝန်ကို မေးလိုက်တယ်လေ။ မေမေ မေးလိုက်တော့မှ ဆရာက စက်မှာ ခဏပြန်ထိုင်လိုက်ရင်း “ကြည့်လို့ရပြီလား မသိဘူး”လို့ ပြောပြီး ပြန်စစ်ကြည့်တယ်။ သူကြည့်တာလည်း ခဏပါပဲ ၁ မိနစ် ၂ မိနစ်လောက်လောက်တောင် ရှိပါ့မလား မသိဘူး။ စစ်ကြည့်ပြီးတာနဲ့ “Not decided yet” လို့ပြောပြီး ပြီးသွားရော။

ဆရာဝန်ကတော့ “ကလေးကြီးထွားနှုန်းက ပုံမှန်ပဲ ဆိုတာရယ်၊ စိုးရိမ်စရာ မရှိဘူးဆိုတာရယ်” ပြောပြီး နောက် ၃ပတ် (အောက်တိုဘာ ၅ ရက်) နေ ပြန်လာခဲ့ဖို့ ထပ်ချိန်းလိုက်တာပါပဲ။ သူနာပြုဆရာမလေးကတော့ “နောက်တစ်ခေါက်ဆိုရင် သိရမှာပါ” ဆိုပြီး မေမေ့ကို နှစ်သိမ့်လိုက်တယ်။ ကလေးကတော့ အားလုံး အခြေအနေကောင်းပေမယ့် မေမေကတော့ အိပ်ကောင်းစားကောင်းမို့ ကိုယ်အလေးချိန် တက်လာတယ်။ ပြီးခဲ့တဲ့ တစ်ခေါက်က ၂ ကီလိုနီးပါး တက်လာပြီး ဒီတစ်ခေါက်ကျတော့ ၃ ကီလို တက်လာလို့ ဆရာဝန်က မေမေ့ကို “ကိုယ်အလေးချိန်တက်တာ များတယ်၊ ပုံမှန် ၁ လကို ၁ ကီလိုပဲ တက်ရမှာ အခု ၃ ကီလိုဖြစ်နေပြီ” လို့ ပြောပြီး စာရွက်မှာ မင်နီတားပေးလိုက်တယ်။ ကျန်တာတွေကတော့ အားလုံး ပုံမှန်ပါပဲ။

ဆေးရုံက အပြန် ရုံးရောက်တာနဲ့ မေမေတို့ မန်နေဂျာက “ဘာလေးလဲ” လို့ တန်းမေးပါလေရော။ “မသိရသေးဘူး” ဆိုတော့ သူက တခြား ဆရာဝန်နဲ့ ပြောင်းပြခိုင်းတယ်။ ပုံမှန် သူများတွေ ၅ လကျော်မှာ သိနေရပြီလေ။ ရုံးက မေမေတို့ အသိ တစ်ယောက်ဆို ၁၈ ပတ်ထဲက သိရတယ်ပြောတယ်။ အဲဒါဆိုတော့ မေမေတို့ မန်နေဂျာနဲ့ ပါပါးက “မိန်းကလေးဖြစ်လို့ နေမှာပေါ့၊ ယောင်္ကျားလေးဆို အခုလောက်ရှိ မြင်သာထင်သာ ရှိလောက်ရောပေါ့၊ ဒါမှမဟုတ် ကလေးက မပြဘူး ဆိုတော့ ရှက်လို့များ ပေါင်စေ့ထားသလားပဲ” လို့ ပြောပြီး နောက်ရင်း ရီမောနေကြတယ်။

မေမေလည်း မန်နေဂျာ ပြောသလို အပြင်မှာ သွားစစ်ကြည့်ရင် ကောင်းမလား လို့တောင် စိတ်ကူးမိပြီး ပါပါးနဲ့ တိုင်ပင်ကြည့်လိုက်သေးတယ်။ ပါပါးကတော့ “ ယောင်္ကျားလေး မိန်းကလေး သိရဖို့ဆိုတာ ဆရာဝန်တွေ အတွက်က ဘာမှ အရေးမကြီးဘူး၊ ကလေး ကျန်းမာဖို့၊ ကြီးထွားနှုန်း ပုံမှန်ဖြစ်ဖို့သာ သူတို့အတွက် အရေးအကြီးဆုံး ဆိုတော့ ကလေးနဲ့ ပတ်သက်ပြီး လိုအပ်တာတွေ အားလုံးကို သေချာစစ်ဆေးပေးတာပဲ၊ အခု ကလေးက အားလုံး OK နေတော့ ကျန်တာတွေကို သိပ်ပြီး အလေးထားပုံ မပေါ်ဘူး။ ဒါကြောင့် အခု မသိရသေးလည်း နောက်တော့ သိရမှာပေါ့၊ အရင်တုန်းက လူတွေဆို မွေးပြီးတော့မှတောင် သိရသေးတာ။ ဟိုဟိုဒီဒီတွေ လျှောက်မတွေးနဲ့” ဆိုပြီး မေမေ့ကို အားပေးရှာတယ်။ ပါပါး ပြောတာလည်း ဟုတ်ပါတယ်လေ။ ဆရာဝန်က ယောင်္ကျားလေး မိန်းကလေး မပြောသေးတာကလွဲပြီး ကလေးကိုရော မေမေ့ကိုပါ သေချာ စစ်ဆေးပေးပါတယ်။ အဲဒီနေ့ ဆေးရုံက ပြန်လာပြီးတဲ့ နောက်ပိုင်း မေမေလည်း ဗိုက်ထဲက ကလေးနဲ့ နေ့တိုင်းလိုလို စကားပြောနေမိတယ်။ နောက်တစ်ခေါက် ဆေးရုံရက်ချိန်းမှာ ultra sound ကြည့်ရင် မေမေတို့ကို ယောင်္ကျားလေး မိန်းကလေးဆိုတာ သိသာအောင် ပြပါ ဆိုပြီးတော့ပေါ့။

နိုဝင်ဘာ ၃၀၊ ၂၀၁၀။

November 28, 2010

သမီးဖတ်ဖို့(၂၀၀၉ ခုနှစ် သြဂုတ်-စက်တင်ဘာလ)

ကိုယ်ဝန် ၄ လကျော်လာတဲ့နောက်ပိုင်းမှာ အဖြေရဆုံးနဲ့ အမေးခံရဆုံး မေးခွန်းတွေကတော့ “ကလေးကို ဘယ်မှာ မွေးမှာလဲ” ဆိုတာရယ်၊ “ဘာလေး လိုချင်လဲ” ဆိုတာရယ်၊ “ယောင်္ကျားလေး၊ မိန်းကလေး သိရပြီလား” ဆိုတာရယ်ပဲ။

အစတုန်းက ရုံးကနေ ဘယ်တော့ ခွင့်စပြီး ယူရမှန်းလည်း မသိ၊ သူတို့ သတ်မှတ်ထားတဲ့ rule တွေကိုလည်း သေချာ မသိသေးတော့ ကလေးကို ဘယ်မှာ မွေးရမယ်မှန်း မဆုံးဖြတ်ရသေးဘူး။ နောက်တော့ ရုံးက HR ၀န်ထမ်းက Maternity Leave နဲ့ပတ်သက်ပြီး အကျိုးခံစားခွင့်နဲ့ ခွင့်ရက်အမျိုးအစားတွေကို ရှင်းပြပေးတယ်။ မေမေတို့ရုံးမှာတော့ Child Birth Leave နဲ့ Child Care Leave ဆိုပြီး ၂ မျိုးရှိတယ်။ Child Birth Leave က မြန်မာလို ဆိုရင်တော့ မီးဖွားခွင့်လို့ ခေါ်မှာပေါ့။ Due date မတိုင်ခင် ၆ ပတ်ကနေ ကလေးမွေးပြီး ၆ ပတ်ကာလ စုစုပေါင်း ၁၂ ပတ်ကို Child Birth Leave အဖြစ်သတ်မှတ်ထားတယ်။ ကလေးမွေးပြီး ၆ ပတ် နောက်ပိုင်းကိုတော့ Child Care Leave လို့ခေါ်တယ်။ Child Care Leave က ကလေးကို စောင့်ရှောက်ဖို့အတွက်ဆိုတော့ အများဆုံး ၁ နှစ်အထိယူလို့ရတယ်။ တကယ်လို့များ ခွင့် ၁ နှစ်ပြည့် သွားပေမယ့် ကလေးကို ကြည့်ပေးမယ့် သူ မရှိတာမျိုး၊ day care ပို့လို့ မရတာမျိုးဆိုရင် နောက်ထပ် ၆ လ ခွင့် ထပ်တင်လို့ရတယ်။ အခုနောက်ပိုင်းတော့ အဖေတွေလည်း Child Care Leave ယူလို့ရတယ်ဆိုပြီး rule တွေ ထပ်ပြောင်းတယ်လို့ ပြောသံကြားမိတယ်။ အဲဒါအပြင် ကလေး နေမကောင်းဖြစ်တာတို့၊ ကာကွယ်ဆေးထိုးဖို့တို့ အတွက်ဆိုရင်လည်း ရုံးကနေ အဲဒီရက်တွေအတွက် ခွင့်ပေးတယ်တဲ့။

မေမေကတော့ သားဦးမို့လို့ ဖြစ်နိုင်ရင် ရန်ကုန်ပြန်ပြီး မွေးချင်တာပါပဲ။ ဒါပေမယ့် ခွင့်အမျိုးအစားတွေ သိရပြီးတဲ့နောက် ရက်တွက်ကြည့်လိုက်တော့ Due Date ကနေ ၆ ပတ်မတိုင်ခင် ဆို ဒီဇင်ဘာ ၇ ရက်နေ့မှ စပြီး Child Birth Leave ယူရမယ်လေ။ အဲဒီအချိန်လောက်ဆို ကိုယ်ဝန်က ၃၄ ပတ်လောက်ဖြစ်နေပြီမို့ ပါပါးက မေမေ့ကို လေယာဉ်စီးပြီး ခရီးမသွားစေချင်တော့ဘူး။ ခရီးက ဝေးတော့ ပါပါး လိုက်မပို့ပဲနဲ့ မေမေတစ်ယောက်တည်း ပြန်ဖို့ဆိုတာကလည်း မဖြစ်နိုင်ဘူးလေ။ အဲဒါဆိုတော့ ပါပါးက မေမေ့ကို လိုက်ပို့ဦး၊ လိုက်ကြိုဦး၊ တော်ကြာ မွေးပြီးသွားရင်လည်း မေမေတို့ကို ထားခဲ့ပြီး အိုဆာကာကို ပြန်လာရဦးမှာပဲ။ ပို့ဦးဟယ်၊ ကြိုဦးဟယ်နဲ့ ခရီးစရိတ်ကလည်း မသက်သာလှပြန်ဘူး။ မတတ်သာတဲ့အဆုံး မေမေတို့လည်း လူကြီးတွေနဲ့ပါ တိုင်ပင်ပြီး သမီးလေးကို ဂျပန်မှာပဲ မွေးဖို့ ဆုံးဖြတ်လိုက်ရတော့တယ်။ ဒါတောင် တချို့က ဂျပန်နိုင်ငံသားဖြစ်အောင် ဂျပန်မှာ မွေးတာလား ဆိုပြီး မေးကြသေးတယ်။ ဒီမှာမွေးတဲ့ နိုင်ငံခြားသား ကလေးတွေကို ဂျပန်အစိုးရကလည်း သူတို့ နိုင်ငံသား မပေးပါဘူး။ ဒါကြောင့် သမီးက ဂျပန်မှာ မွေးမယ့် မြန်မာနိုင်ငံသား စစ်စစ်ပါ။

မေမေ ကိုယ်ဝန်ဆောင်ထားရပြီဆိုကတည်းက ရုံးမှာရော သူငယ်ချင်းတွေကပါ “ဘာလေးလိုချင်လဲ” လို့ မေးကြတယ်။ ဂျပန်တွေကတော့ ကလေးမွေးရင် “ အိချိ ဟိမဲ နိ တရော့ ( ichi hime ni taro 一姫二太郎)” ဆိုပြီး ဖြစ်စေချင်ကြတယ်။ အဓိပ္ပါယ်က အကြီးဆုံးကလေးကို မိန်းကလေး ဖြစ်စေချင်ကြပြီး ဒုတိယ ကလေးကိုတော့ ယောင်္ကျားလေး ဖြစ်စေချင်ကြတယ်။ မေမေနဲ့ ပါပါး ကတော့ ဘာလေးပဲ ဖြစ်ဖြစ် လိုချင်ပါတယ်။ ကိုယ့်ရင်သွေးပဲ မဟုတ်လား။ မိန်းကလေးဆိုလည်း မေမေနဲ့ တိုးတိုးဖော်ရတယ်၊ ယောင်္ကျားလေးဆိုလည်း ပါပါးနဲ့ ဂိမ်းဆော့ဖို့ အဖော်တိုးတယ်လို့ပဲ အောက်မေ့မိပါတယ်။ ဒါပေမယ့် မေမေတို့ရဲ့ နှစ်ဘက်မိဘတွေက တရုတ်လူမျိုးတွေဆိုတော့ အင်းစိန် အန်းကုန်း၊ အန်းမက သူတို့ မြေးဦးလေးကို ယောင်္ကျားလေး ဖြစ်စေချင်ကြတယ်။ သမီးရဲ့ တောင်ငူ အန်းကုန်းကလည်း ရှေ့က မြေး ၂ ယောက်က မိန်းကလေးဖြစ်ပြီးသားမို့ မေမေ့တို့ရဲ့ ရင်သွေးကိုတော့ ယောင်္ကျားလေး ဖြစ်မယ်လုိ့ မျှော်လင့်ထားရှာတယ်။ သမီးရဲ့ ပါပါးကတော့ ဘာလေးရယ်မှ လို့ မပြောပေမယ့် သမီးအကြီးတွေက များသောအားဖြင့် မိဘအပေါ်ကို သိတတ်တယ် ဆိုတော့ မိန်းကလေးဖြစ်လည်း မဆိုးပါဘူး၊ ယောင်္ကျားလေးဆိုလည်း လူကြီးတွေ ပျော်ရတာပေါ့ လို့ပဲ ပြောတယ်။ မေမေတို့များ ရန်ကုန်ကိုဖြစ်ဖြစ် တောင်ငူကိုဖြစ်ဖြစ် ဖုန်းဆက်ပြီဆို သမီးအဘိုးအဘွားတွေက "ဟလို" ပြီးတာနဲ့ နောက်မေးခွန်းက “ဘာလေးလဲ သိရပြီလား” ဆိုပြီး မေးတော့တာပဲ။ မေမေရဲ့ ဆရာဝန်ကလည်း ဘာမှမပြောသေးတော့ “မသိရသေးဘူး ၊ နောက်တစ်ခေါက်ဆို သိရမယ်နဲ့တူတယ်၊ အခုက နည်းနည်းစောနေသေးတယ်” လို့ပဲ ဖြေရတာပေါ့။

ကိုယ်ဝန် ၃ လကျော် ၄ လ ထဲဝင်လာတော့ သမီး အန်းမက သေချာ သတိထားနေရင် ကလေးလှုပ်တာကို သိရတယ်လို့ ပြောပေမယ့် မေမေ့စိတ်ထဲတော့ သိပ်မသိသာသလိုပဲ။ ဒါပေမယ့် အိပ်နေရင်းက တစ်ခါတလေ ဗိုက်ကို သွားစမ်းမိရင် ညာဘက်မှာ လုံးလုံးလေးတော့ စမ်းမိနေတတ်တယ်။ သိပ်မကြာဘူး ထပ်စမ်းရင် အဲဒီနေရာမှာမရှိတော့ပဲ ဗိုက်အလယ်လောက် ရောက်လာပြန်ရော။ တပတ်လောက်ကြာတော့ ဗိုက်ထဲက တချက် တချက် လှုပ်တာကို ခံစားမိလာတယ်။ ကိုယ်ဝန် ၅ လထဲလည်း ၀င်လာရော သမီးလေးက အသားကုန်ကို တွန်းကန်ပြီး လှုပ်ရှားတော့တာပဲ။ ဗိုက်ဆာနေတဲ့ အချိန်ဆို ပိုဆိုးတယ်။ လိမ့်လိမ့်ပြီး တက်တာ မူးတောင် မူးတယ်။ မေမေက ဗိုက်ဆာတော့ အထဲက သမီးလေးလည်း အနေခက်နေတယ်နဲ့တူပါရဲ့။ အဲဒီအချိန်ဆို မေမေလည်း မရှိ ရှိတာ ပြေးစားရတော့တာပဲ။ စားစရာ မရှိရင်လည်း နွားနို့ဖြစ်ဖြစ် သောက်လိုက်မှ အထဲက ငြိမ်သွားတော့တယ်။

နောက်ပြီး ၀မ်းလည်း တအား ချုပ်တယ်။ ၀မ်းအရမ်းချုပ်လာတော့ လေထိုးတာလေ အရမ်းခံရခက်တာပဲ။ အဲဒါကြောင့် မေမေလည်း ကလေးမွေးဖူးတဲ့ သူငယ်ချင်းတွေကို မေးကြည့်မိတယ်။ သူတို့က ၀မ်းနှုတ်ဆေးကို ဆရာဝန်နဲ့ တိုင်ပင်ပြီးမှ သောက်ဖို့နဲ့ ၀မ်းပျော့ပျော့သွားအောင် မန်ကျီးဖျော်ရည်လိုမျိုး၊ အရည်ရွှမ်းတဲ့ အသီးအနှံစားဖို့ အကြံပေးကြတယ်။ မေမေ့ရဲ့ ဂျပန်ဆရာမကလည်း ဖျော်ရည်ဘူးလေးတွေ ၀ယ်သောက်ဖို့ ပြောတယ်။ အဲဒီဖျော်ရည်က ပဲနို့၊ ဒိန်ချဉ် နဲ့ အသီးအနံ့လေး ထည့်ထားတော့ သောက်ရတာ လွယ်တာပေါ့။ ဒါကြောင့် ရုံးဖွင့်ရက်ဆို အဲဒီဖျော်ရည်ဘူးကို တစ်နေ့ တစ်ဘူး မှန်မှန်သောက်ပေးပြီး ရုံးပိတ်ရက်ဆိုရင်တော့ မန်ကျီးဖျော်ရည် သောက်ပေးတော့မှပဲ ၀မ်းချုပ်လို့ လေထိုး လေအောင့်တာ သက်သာသွားတော့တယ်။ အဲဒါတွေအပြင် ရိုးရိုးရေလည်း မေမေက ခဏခဏ သောက်ပေးဖြစ်တယ်။

ကိုယ်ဝန် ၅ လလောက်ရှိလာတော့ မေမေ့ဗိုက်လည်း သိသာတယ်လေ။ ဗိုက်ကြောင့် သွားလာရတာလည်း အရင်လို မကောင်းဘူးပေါ့။ နောက်ပြီး ခြေလက်တွေလည်း နည်းနည်းပြည့်ပြီး တင်းလာတယ်။ ဗိုက်ထဲက ကလေးက ထွားလာလေ ခါးနာတဲ့ ဝေဒနာကလည်း တဖြည်းဖြည်း ပိုဆိုးလာလေပဲ။ ထိုင်ပြီးထလိုက်ရင် ခါးက တဆတ်ဆတ်နဲ့ နာနေရော။ အဲဒါ မေမေက သူနာပြု ဆရာမကို ပြောပြတော့ သူက ကိုယ်ဝန်ဆောင်သည်တွေ ခါးနာရင် ပတ်တဲ့ ခါးပတ်မျိုး ၀ယ်ပတ်ခိုင်းတယ်။ အဲဒီ ခါးပတ်က ဗိုက်ကို ပင့်ပေးထားတဲ့အတွက် ခါးနာတာ သက်သာတယ်လို့ ပြောတာနဲ့ မေမေလည်း ကိုယ်ဝန် ၁၈ ပတ်လောက်က စပြီး အဲဒီ ခါးပတ် ၀ယ်ပတ်ဖြစ်ခဲ့တယ်။ ဗိုက်ကလည်း သိသာလာတော့ ဗိုက်တင်းတာ သက်သာအောင်ရယ်၊ ဗိုက်ကြောတွေ မပြတ်အောင်ဆိုပြီး coca butter cream လိမ်းဖြစ်ခဲ့တယ်။

ကိုယ်ဝန် ၄ လကျော်လာတဲ့ နောက်ပိုင်း ဘာပဲ စားရ စားရ စားကောင်းလွန်းလို့ ပါးစပ်ကို မနည်းပဲ ဘရိတ်အုပ်နေရတယ်။ ဆရာဝန်က မ ၀ စေနဲ့၊ အရမ်းမစားနဲ့လို့ မှာထားတာတောင် တစ်ခါတလေ စားတာ အရှိန်လွန်သွားရင် ဗိုက်ကြီးတင်းပြီး သိပ်မလှုပ်ရှားနိုင်တော့ဘူး။ အဲဒါကြောင့် ဗိုက်ပြည့်ရုံလောက်ကို ချင့်ချိန်ပြီး စားရတယ်။ ထမင်းစားကောင်းတဲ့အပြင် အိပ်လို့လည်း ကောင်းမှ ကောင်းပဲ။ အိမ်ပြန်ရောက်လို့ ထမင်း စားသောက်ပြီးတာနဲ့ တီဗွီကြည့်ရင်း ဆိုဖာပေါ်တင် အိပ်ပျော်ပျော်သွားတာ အကြိမ်ပေါင်း မနည်းဘူး။ တစ်ခါတလေလည်း ကွန်ပျူတာ ဖွင့်ပြီး Blog ဖတ်နေရင်းက အိပ်ပျော်နေတာလည်း ရှိလိုက်သေးတယ်။ အရင် သမီးလေး မရှိခင်တုန်းကဆို မနက် ၁ နာရီဆိုလည်း မအိပ် ၂ နာရီဆိုလည်း မေမေ အိပ်သေးတာ မဟုတ်ဘူး။ အခုတော့ ည ၁၀ နာရီလောက်ဆို အိပ်ပျော်သွားပြီး ရုံးတက်ဖို့ မနက် ၈ နာရီကို မနည်းပဲ ကုန်းရုန်း ထရတယ်။

သြဂုတ်လ ၂၄ ရက်နေ့ ရောက်တော့ ထုံးစံအတိုင်း ဆရာဝန်နဲ့ ပြဖို့ ဆေးရုံးကို သွားရပြန်တယ်လေ။ အဲဒီနေ့က ၂၀ ပတ်နဲ့ ၁ ရက်တဲ့ သမီးလေးက ၃၇၃ ဂရမ် ဖြစ်လာပြီး အရင်တစ်ခေါက်ထက်စာရင် ၂ ဆ ကျော်ကျော်လောက် ထွားလာတာပေါ့။ ultra sound ရိုက်တော့ သမီးရဲ့ မျက်လုံးလေးတွေ၊ နှာခေါင်းနဲ့ ပါးစပ်လေးလည်း မြင်ရတယ်၊ ပြီးတော့ လက်တွေ ခြေထောက်တွေလည်း ကောင်းကောင်းမြင်နေရပြီ။ Screen မှာ ကြည့်လိုက်ရင် သမီးလေးက လှုပ်စိ လှုပ်စိလေးမို့ ကြည့်ရတာ အသည်းယားဖို့ အရမ်းကောင်းတာပဲ။ အဲဒီနေ့က သမီးမျက်နှာလေးကို မြင်ရတော့ စိတ်ကူးထဲကနေ ဘယ်သူနဲ့တူလဲ ဆိုပြီး ပုံဖော်ကြည့်နေမိတယ်။ ဆရာဝန်ကတော့ မေမေတို့ကို ကလေးလည်း နေကောင်းတယ်၊ အားလုံး ပုံမှန်ပဲမို့ ကလေးရဲ့ ကြီးထွားမှုကို အားရတယ်လို့ပြောတယ်။ ဆရာဝန်ကိုယ်တိုင်က အားရတယ်ဆိုတော့လည်း မေမေတို့က ပိုပြီး စိတ်ချမ်းသာရတာပေါ့ သမီးရယ်။

မေမေနဲ့ ရှေ့ဆင့်နောက်ဆင့် ကိုယ်ဝန်ဆောင်တဲ့သူတွေက ယောင်္ကျားလေး မိန်းကလေး သိနေရပြီလို့ ပြောတော့ မေမေလည်း ဆရာဝန်ကို အရဲစွန့်ပြီး “ယောင်္ကျားလေး မိန်းကလေး ကြည့်လို့ရပြီလား” လို့ မေးလိုက်တယ်။ အဲဒီတော့ ဆရာဝန်က စက်မှာ ပြန်ထိုင်ရင်း ခဏလောက်ကြည့်ပေးပြီး “Not fully developed” လို့ပဲ ဖြေတယ်။ မေမေ့ကို နောက် ၃ ပတ် (စက်တင်ဘာ ၁၄ ရက်) နေ့မှာ ပြန်လာပြဖို့ ရက်ချိန်းပေးလိုက်တယ်။


နိုဝင်ဘာ ၂၈၊ ၂၀၁၀။

November 15, 2010

သမီးဖတ်ဖို့(၂၀၀၉ ခုနှစ် ဇူလိုင် - သြဂုတ်လ)

ဂျပန်က ဆရာဝန်တွေရဲ့ အယူအဆ နဲ့ ကိုယ်ဝန်ဆောင်သည်တွေ အတွက် ညွှန်ကြားထားတာလေးတွေကို ဗဟုသုတဖြစ်အောင် ပြောပြရဦးမယ်။ ဒီက ဆရာဝန်တွေကတော့ ရှင်းတယ် သမီးရေ။ ပါပါးက “ကိုယ်ဝန် အတွက် အာဟာရပြည့်အောင် ဘယ်လို အားဆေးတွေ သောက်ဖို့လိုအပ်သလဲ” လို့ မေးတော့ ဆရာဝန်က “ဘာဆေးမှ သောက်စရာမလိုဘူး။ အစားလည်း ရှောင်နေစရာ မလိုဘူး၊ အားလုံး စားလို့ရတယ်” ဆိုပြီး ခပ်တိုတိုပဲ ပြန်ဖြေတယ်။ အဲဒါဆိုတော့ မေမေလည်း ရန်ကုန်က ယူလာတဲ့ ကိုယ်ဝန်ဆောင် အားဆေးကို ဆက်မသောက်ဖြစ်တော့ဘူး။

အရင်အခါတွေတုန်းက ဆေးရုံပြရတဲ့ရက်ဆို ဆရာဝန်က စမ်းသပ်ပြီးရင် နောက်ဆုံး သူနာပြုဆရာမနဲ့ သွားတွေ့ပြီး သူတို့မေးတဲ့ မေးခွန်းတွေကို ၁ နာရီနီးပါး ဖြေရသေးတယ်။ သူနာပြုဆရာမ မေးတာက နေ့စဉ် စားတဲ့ အစားအစာ၊ ဘယ်အချိန်စားလဲ၊ မနက်ဘယ်နာရီအိပ်ယာထလဲ၊ ရုံးသွားရင် ဘယ်လိုသွားလဲ၊ ရုံးမှာ ဘယ်နှစ်နာရီ အလုပ်လုပ်ရလဲ၊ စတဲ့ မေးခွန်းတွေ ဖြေရတယ်။ ပြီးတော့ ကိုယ်ဝန်ဆောင်တာနဲ့ ပတ်သက်ပြီး ဗဟုသုတ အနေနဲ့ ဘာတွေ သိထားလဲ ဆိုတာလည်း မေးတယ်။ အဲဒီတော့ မေမေက “အလေးအပင်မ မ ရဘူး၊ ဒေါက်မြင့်ဖိနပ် မစီးရဘူး၊ အပူအစပ် မစားရဘူး” ဆိုပြီး ကိုယ်သိတာလေးကို ပြောပြရတာပေါ့။ မေမေ ဖြေပြီးတော့မှ သူနာပြုဆရာမက ကိုယ်ဝန်ဆောင်မိခင်လောင်းတွေက အအေးမမိစေရဘူး၊ ဖြစ်နိုင်ရင် မေမေ့ကို အမြဲပဲ အနွေးထည်ဆောင်ထားခိုင်းတယ်။ ပြီးတော့ အချိုတွေ သိပ်မစားခိုင်းဘူး။ အခုလောလောဆယ် မေမေ့မှာ သွေးတိုးနဲ့ ဆီးချိုတော့ မရှိပေမယ့် မွေးခါနီးရင် သွေးတိုးတတ်လို့ အငန်တွေလည်း မစားခိုင်းဘူး။ နောက်ပြီး အစားကို အများကြီးလည်း မစားခိုင်းပြန်ဘူး။ ကိုယ်ဝန်ရှိချိန်မှာ မ ၀ တာ၊ ၀ိတ် မတက်တာ ကို ပိုပြီး သဘောကျကြတယ်။ တကယ်လို့ မိခင်က အရမ်းဝရင် ကလေး ရော မိခင်ပါ မွေးခါနီးရင် ဒုက္ခရောက်နိုင်တယ်တဲ့။ မိခင်က အစား အများကြီး စားတဲ့အတွက် ကလေးက တအားထွားတဲ့အပြင် သွေးတိုးတာပါ ပိုဖြစ်နိုင်တယ် ဆိုပြီး မေမေ့ကို ပြောပြတယ်။ တစ်လကို ပုံမှန် ၁ ကီလိုလောက်ပဲ တက်တာ အကောင်းဆုံးပဲတဲ့။ အဲဒီ မတိုင်ခင်ကတော့ ပါပါးက မေမေ့ကို ထမင်းအများကြီး စားခိုင်းတယ်လေ။ အမှန်တော့ ပါပါးက စိတ်ပူပြီး ကိုယ်ဝန်နဲ့ဆိုတော့ ကလေးအတွက်ပါ ပိုစားမှ မိခင်က အားရှိမယ်ဆိုပြီး စားခိုင်းတာ။ အခုလို သူနာပြု ဆရာမတွေ ရှင်းပြလိုက်တော့မှပဲ ပါပါးလည်း မေမေ့ကို အစား အများကြီး မစားခိုင်းတော့ဘူး။

နောက်ထပ် မေးခွန်းတွေက နှစ်ဘက် မိဘတွေ နဲ့ မေမေတို့မှာ ရောဂါ ရှိမရှိ၊ မီးဖွားခါနီးရင် မေမေနဲ့ ဘယ်သူလာနေပေးမလဲတို့၊ မွေးခန်းထဲကို ပါပါးအပြင် တခြား ဘယ်သူလိုက်ဦးမလဲတို့၊ ကလေးမွေးပြီးသွားရင် မိသားစုဝင်တွေထဲက မေမေ့ကို ဘယ်သူလာကြည့်ပေးမလဲတို့ ၊ မေမေ့သူငယ်ချင်းတွေထဲမှာ ကိုယ်ဝန်ဆောင် ကလေးမွေးဖူးတဲ့ မိခင်ရှိလားတို့၊ ပြီးတော့ မေမေတို့ နေတဲ့ အနီးနားမှာရော ကိုယ်ဝန်ဆောင် ကလေးမွေးဖူးတဲ့သူရှိလား စတဲ့မေးခွန်းတွေ မေးတယ်။ မွေးခန်းထဲ ၀င်မယ့်သူရော၊ ကလေးမွေးပြီးသွားလို့ လာကြည့်မယ့်သူရော၊ ဆေးရုံကနေ အိမ်ပြန်ရောက်လို့ ကလေးကို ၀ိုင်းကြည့်ပြီး စောင့်ရှောက်ပေးမယ့် သူရော မေးခွန်း အားလုံးအတွက် အဖြေက အတူတူပဲလေ။ ပါးပါးတစ်ယောက်ပဲ ရှိတာဆိုတော့ ဘာမေးမေး မေမေက ပါပါးကိုပဲ လက်ညှိုးထိုးပြလိုက်တယ်။ အဲဒါဆိုတော့ သူနာပြု ဆရာမက ပါပါးအပြင် တခြားသူကို ပြောပါဆိုတော့ မေမေတို့မှာ တခြားပြောစရာ လူမရှိဘူး။ မေမေနဲ့ အလုပ်အတူတူလုပ်နေတဲ့သူတွေထဲက ကလေးမွေးဖူးတဲ့သူတွေ ရှိပေမယ့် သူတို့က အိုဆာကာမှာ နေကြတာမဟုတ်ဘူး။ အဲဒါဆိုတော့ အနီးအနားမှာရော သူငယ်ချင်းတွေထဲမှာပါ ကလေးမွေးဖူးတဲ့သူ မရှိဘူးလို့ပဲ ဖြေလိုက်ရတယ်။ မွေးပြီးရင် သမီးအန်းမကလည်း မေမေနဲ့ လာနေပေးနိုင်မှာ မဟုတ်ဘူးလို့ သူတို့ကိုပါ ကြိုပြောထားလိုက်တော့ သူနာပြုဆရာမလည်း တော်တော်ကို စိတ်ရှုတ်သွားပုံရတယ်။ သူတို့ကတော့ မေမေ့အတွက်ရော သမီးလေးအတွက်ပါ စိုးရိမ်လို့ ကြိုတင် စီစဉ်ထားရအောင် မေးတာပါ။ ဒါကြောင့်လည်း မေမေဖြေတာတွေ အားလုံးကို သူတို့က မှတ်တမ်းလိုမျိုး ရေးမှတ်ထားတယ်။ အဲဒါအပြင် ကိုယ်ဝန်ဆောင်သည်တွေ ဖတ်ဖို့ ဆေးရုံက ထုတ်ထားတဲ့ စာအုပ်လည်း ထုတ်ပေးတယ်။ စာအုပ်ထဲမှာပါတာက ကလေးမမွေးခင်၊ မွေးပြီးချိန်နဲ့ ဆေးရုံတက်နေတုန်းမှာ သိထားသင့်တာတွေကို ရှင်းပြထားတာပါပဲ။

ကံကောင်းတာ တစ်ခုက မေမေ့ကို ဂျပန်စာ သင်ပေးနေတဲ့ ဆရာမကလည်း မေမေနဲ့ ရှေ့ဆင့်နောက်ဆင့်ဆိုသလို ကိုယ်ဝန်ရှိလာတယ်။ အဲဒီတော့ ဆရာမက မေမေ့ကို ကိုယ်ဝန်နဲ့ပတ်သက်တာ၊ ကလေးနဲ့ပတ်သက်တာအပြင် တခြားသိသင့်တာတွေနဲ့ ဂျပန်လို အခေါ်အဝေါ်တွေကို အိမ်မှာ လာသင်ပေးရှာတယ်။ နောက်ပြီး မေမေ သိချင်တာ နားမလည်တာရှိရင်လည်း ဆရာမက မေမေ့ကိုစာဖတ်ပြီး ပြန်ပြောပြပေးတယ်။ ဆရာမကျေးဇူးတွေ မေမေ့မှာ အများကြီးပါပဲ။ မေမေတို့ နှစ်ယောက် တွေ့ပြီဆို တစ်ယောက် အခြေအနေ တစ်ယောက်ပြောပြပြီး အချင်းချင်း အားပေးနှစ်သိမ့်ရတာပေါ့။ မေမေကတော့ ထိုင်ရလွန်းလို့ ခါးနာတဲ့ ဝေဒနာ ခံစားရပြီး ဆရာမကတော့ အလုပ်ထဲမှာ မတ်တပ်ရပ်ရလွန်းလို့ ကိုယ်ဝန် လနုတုန်းမှာ ခြေထောက်တွေ ပြည့်ပြီး ဖောတဲ့ ဝေဒနာကို ခံစားရတယ်။ ဒါတောင် သမီးလေး ကိုယ်ဝန်ကို လွယ်ထားရပြီဆိုကတည်းက မေမေ့ အလုပ်ထဲက လူကြီးတွေက မေမေ့ကို ငဲ့ညှာပြီး အချိန်ပို လုပ်ခိုင်းတာတို့၊ နောက်ကျပြီး ရုံးမှာ နေရတာမျိုးတို့ မလုပ်ခိုင်းတော့ဘူး။ အလုပ်ကိုလည်း ပုံမှန်အတိုင်း လုပ်နေရယုံပဲမို့ တော်သေးတယ်လို့ ပြောရမှာပေါ့။

ကိုယ်ဝန် ၃ လကျော်လာတဲ့ နောက်ပိုင်းတော့ မေမေလည်း နေရတာ၊ လှုပ်ရှားရတာ တဖြည်းဖြည်း ပေါ့ပါး လာတယ်။ အရင်လို မောတာ ပင်ပန်းတာလည်း သက်သာလာတဲ့အပြင် အိပ်ကောင်း၊ စားကောင်းဖြစ်လာတယ်။ အဲဒီတော့ မေမေ့ကို အင်းစိန် အန်းမကရော၊ သူငယ်ချင်းတွေကပါ ဘာစားချင်လဲ၊ ဘာချဉ်ခြင်းတပ်လဲ လို့ မေးကြတယ်။ ကိုယ်ဝန်ဆောင် မိခင်သည်တွေ ချဉ်ခြင်းတပ်တာလည်း အတော်ထူးဆန်းတယ်လို့ပဲ ပြောရမှာပဲ။ မေမေကတော့ သားကြီး ငါးကြီးနဲ့ အဆီအစိမ့်တွေထက်ကို ရန်ကုန်မှာ ၀ယ်လို့ရတဲ့ ငါးမျိုး (ရေချိုငါး) ပိုစားချင်တယ်။ ဂျပန်မှာက ပင်လယ်ငါး ပေါပေမယ့် ရေချိုငါးက ရှားတယ် မဟုတ်လား။ အဲဒါဆိုတော့ ထူးထူးခြားခြား ချဉ်ခြင်းတပ်ပြီး စားချင်စိတ်လည်း မဖြစ်မိတော့ပါဘူး။

ဒီလိုနဲ့ ဇူလိုင်လ ၂၇ ရက်နေ့မှာ ဆရာဝန်နဲ့တွေ့ဖို့ ဆေးရုံသွားရပြန်တယ်။ ဆရာဝန်နဲ့ မတွေ့ခင်မှာ ဆေးရုံရောက်တာနဲ့ အရင်ဆုံး သွေးပေါင်ချိန်ရတယ်၊ ပြီးတော့ ကိုယ်အလေးချိန် တိုင်းရတယ်။ နောက်ပြီး ဆီးစစ်ရတယ်။ သွေးပေါင်ချိန်တာနဲ့ ကိုယ်အလေးချိန် ကိုတော့ စက်တွေ ချပေးထားလို့ ကိုယ့်ဘာသာကိုယ်ပဲ တိုင်းရတယ်။ ပြီးမှ ရလာတဲ့ အဖြေကို သူနာပြုဆရာမလေးတွေကို ပေးလိုက်ရင် သူတို့က မိခင်နဲ့ ကလေးမှတ်တမ်းစာအုပ်မှာ မှတ်ထားပေးတယ်။ ဆီးစစ်တဲ့အဖြေကတော့ ဆရာဝန်ဆီ တိုက်ရိုက်သွားတာမို့ မေမေတို့ သိစရာ မလိုဘူး။ နောက်ပြီး ကိုယ်ဝန် ၁၂ ပတ်ကျော်လာတဲ့နောက်ပိုင်းဆို မေမေ့ရဲ့ ဗိုက်ကိုပါ ပေကြိုးနဲ့ တိုင်းယူတယ်။ အဲဒါပြီးတော့ ဆရာဝန်က Echo ကြည့်မယ်လို့ ပြောပြီး စက်တစ်ခုရှေ့မှာ မေမေ့ကို စမ်းသပ်ပေးတာပဲ။ ဆရာဝန် စမ်းသပ်ချိန်ဆို ပါပါးလည်း ဘေးမှာ ရှိနေတော့ ဆရာဝန်က monitor screen ကနေ မြင်ရတဲ့ သမီးရဲ့ ပုံရိပ်လေးကို သေချာ ရှင်းပြပေးတယ်။ ပြီးတော့မှ မေမေ့ဗိုက်ထဲက သမီးရဲ့ ပုံလေးကို print ထုတ်ပြီး မေမေတို့ကို တစ်ရွက်ပေးတယ်။ အဲဒီနေ့က ကိုယ်ဝန် ၁၆ ပတ်နဲ့ ၁ ရက်ရှိတဲ့ သမီးလေးရဲ့ ကိုယ်အလေးချိန်က (၁၃၅) ဂရမ်တဲ့။ အဲဒီနေ့ကစပြီး ဆရာဝန်က သမီးရဲ့ အရပ်ကို မတိုင်းပေးတော့ဘူး။ ပြီးတာနဲ့ “ကလေးရဲ့ ကြီးထွားနှုန်းလည်း ပုံမှန်ပဲ၊ အနေအထားလည်း ပုံမှန်ပဲမို့ စိုးရိမ်စရာ ဘာမှ မရှိဘူး၊ နောက်တစ်လ (သြဂုတ် ၂၄ ရက်) နေမှ ပြန်လာပြ” လို့ မေမေတို့ကို ပြောတယ်။ နောက်ပြီး မေမေ့သွေးအမျိုးအစား ထပ်စစ်ထားတာကလည်း “A” သွေးပဲ ဆိုပြီး ထပ်ပြောပြတယ်။ အဲဒီနေ့က ကိုယ်ဝန် ၄ လရှိတဲ့ မေမေ့ရဲ့ ကိုယ်အလေးချိန်က ၄၉.၈၂ ကီလို ရှိတယ် သမီးရဲ့။




နိုဝင်ဘာ ၁၅၊ ၂၀၁၀။

November 2, 2010

DPT Vaccine

သမီးလေးကို မေလမှာ BCG ကာကွယ်ဆေး ထိုးပေးခဲ့တာကို ပို့စ် အဖြစ်ရေးခဲ့ဖူးပါတယ်။ BCG ကာကွယ်ဆေး ထိုးပြီး တစ်လအကြာမှာ DPT (မေးခိုင်၊ ဆုံဆို့၊ ကြက်ညှာ) ကာကွယ်ဆေး ထိုးပေးရပါတယ်။ ဂျပန်မှာတော့ အဲဒီ ဆေး ၃ မျိုးကို တစ်လ တစ်ခါနဲ့ သုံးလ ဆက်တိုက် ထိုးပေးရမယ်လို့ ညွှန်ကြားထားတယ်။

ဇွန်လရောက်တော့ ကျမတို့ ကိုယ်ရေးကိုယ်တာ ကိစ္စ တစ်ခုကြောင့် မြန်မာပြည် ပြန်သွားခဲ့ရတယ်။ တကယ်တမ်း ကာကွယ်ဆေး ထိုးတော့ ဇူလိုင်လမှပဲ သွားထိုးပေးဖြစ်ခဲ့ပါတယ်။ အကြောင်းက မြန်မာပြည်က ပြန်လာတော့ သမီးလေး ကိုယ်မှာ မိတ်ဖုလို အပူဖုတွေ ထွက်တာ တော်တော်နဲ့ မပျောက်ပါဘူး။ ဆရာဝန်နဲ့ ပြတော့ လိမ်းဆေး ပေးလိုက်ပြီး ထိုးလက်စ ကာကွယ်ဆေး အားလုံး ရပ်ထားဖို့ မှာလိုက်တာနဲ့ မိတ်ဖုတွေ အရှင်းပျောက်မှပဲ ဇူလိုင်လ ၁၄ မှာ ကာကွယ်ဆေး ထိုးဖြစ်ခဲ့ပါတယ်။

ဆေးက အလကား ထိုးပေးတာ ဖြစ်ပြီး ဆေးထိုးဖို့ကို နီးစပ်ရာ ဆေးရုံ ဒါမှ မဟုတ် ဆေးခန်းမှာ သွားထိုးလို့ရပါတယ်။ ကျမကတော့ အိမ်နဲ့ နီးတဲ့ ကလေး ဆေးခန်းမှာပဲ သွားထိုးဖြစ်ခဲ့တယ်။ ဆေးခန်းမှာထိုင်တာက ဆရာဝန်မကြီး တစ်ယောက်တည်းပါ။ ဆရာဝန်မကြီးက အသက်က ၇၀ ကျော်လောက် ရှိပြီလို့ ထင်ရပေမယ့် သူ့ ကြည့်ရတာ သွက်သွက်လက်လက် သန်သန်မာမာ ပါပဲ။

ကာကွယ်ဆေး မထိုးခင် ထုံးစံအတိုင်း form မှာပါတဲ့ မေးခွန်းတွေ ဖြေပြီး ကလေး ကိုယ်အပူချိန်ကို တိုင်းယူပါတယ်။ ပြီးတော့ ဆရာဝန်မကြီးက ရင်ဘတ်ကို နားကြပ်နဲ့ထောက်ပြီး စမ်းသပ်ပေးတဲ့အပြင် အာခေါင်ကိုလည်း လက်နှိပ်ဓာတ်မီးနဲ့ထိုးကြည့်ပါတယ်။ ပြီးတော့မှ ဆေးထိုးပေးတာပါ။ ဆေးထိုးတာက အပ်သေးသေးလေးနဲ့ လက်မောင်းမှာ ထိုးတာမို့ စစချင်း သမီးလေးက လန့်ပြီး အော် ငိုပါတယ်။ ခဏလောက်နေတော့မှ အငို တိတ်ပြီး ရီရီမောမော ပြန်ဖြစ်သွားတယ်။ ဆေးထိုးအပြီးမှာ ကျမက ထိုးထားတဲ့ နေရာကို လက်နဲ့ခြေပေးမယ် လုပ်တော့ ဆရာမကြီးက ဖိယုံတင် ဖိခိုင်းထားပြီး ဆေးကို မခြေခိုင်းပါဘူး။ ပြန်ခါနီးတော့ ဒုတိယအကြိမ် ကာကွယ်ဆေးကို နောက် ၃ ပတ်အကြာမှာ လာထိုးဖို့ ရက်ချိန်းပေးလိုက်ပါတယ်။ အဲဒီလိုနဲ့ သြဂုတ်လ (၁၈) ရက်နေ့မှာ ဒုတိယအကြိမ် ကာကွယ်ဆေး နဲ့ စက်တင်ဘာ (၂၁) ရက်နေ့မှာ တတိယအကြိမ် ကာကွယ်ဆေး သွား ထိုးပေးဖြစ်ခဲ့တယ်။ ဆေး ၃ လုံးစလုံး ထိုးပြီးသွားပေမယ့် နောက် ၁ နှစ် ဒါမှမဟုတ် ၁ နှစ်ခွဲအကြာမှာ ထပ် လာထိုးရမယ်လို့လည်း မှာလိုက်ပါတယ်။

သမီးလေးကို ပထမအကြိမ်နဲ့ ဒုတိယ အကြိမ် ကာကွယ်ဆေးတွေ ထိုးတုန်းကတော့ ပုံမှန်ပါပဲ။ မှတ်မှတ်ရရ တတိယ အကြိမ် ကာကွယ်ဆေး သွားထိုးတော့ သူ့ပါပါး ပါ လိုက်ပေးပါတယ်။ အဲဒီနေ့က ဆေးထိုးတော့ သမီးလေး ငိုတာ အသံတောင် ပျောက်ပါတယ်။ တစ်ခါမှ အဲဒီလောက် ငိုတာ မမြင်ဖူးပါဘူး။ အော်ငိုတာများ နှုတ်ခမ်းတွေတောင် ပြာပြီး ရှိုက်ကြီး တငင်ငိုတာမို့ ကျမ တော်တော် လန့်သွားမိတယ်။ ဒါကြောင့် ဆေးခန်းမှာပဲ အဖေတစ်လှည့် အမေတစ်လှည့် ချော့ရင်း အငိုတိတ်အောင် ခဏစောင့်ပြီးမှ အိမ်ပြန်လာခဲ့ကြပါတယ်။ အရင်တုန်းက ဆေးထိုးရင် အခုလိုမျိုး အကြာကြီး မငိုတတ်ပါဘူး။ အခုမှ ဘယ်လိုဖြစ်လဲ မသိဘူးလို့တောင် သူ့ပါပါးကို ပြောဖြစ်ပါသေးတယ်။

အဲဒီနေ့က ဆေးခန်းကနေ အိမ်ပြန်လာတယ် ဆိုပေမယ့် လမ်းမှာ ဈေးဝယ်ဖို့အတွက် တခြားနေရာကို သွားလိုက်မိတယ်။ တစ်လမ်းလုံးလည်း ဂျီကျပြီး တွန်းလှည်းထဲ ထည့်မရလို့ သူ့ကို အဖေနဲ့ အမေ တစ်ယောက် တစ်လှည့် ချီပြီး သွားရပါတယ်။ ဈေးဝယ်ပြီး အပြန် ဘတ်စ်ကားပေါ်ကျမှ ဇာတ်လမ်းက စပါတော့တယ်။ ကျမဘေးမှာ ထိုင်တာက ဘွားဘွားကြီးတစ်ယောက်ပါ။ ဘွားဘွားကြီးက သမီးလေးကို စကားပြောပြီး ချော့မြူပါတယ်။ သမီးလေးက အဲဒီ ဘွားဘွားကြီးကို သေချာ စိုက်ကြည့်ပြီး နောက်တော့ အသံအကျယ်ကြီးနဲ့ အော် ငိုပါလေရော။ အဲဒါနဲ့ ကျမလည်း ကလေး စိတ်ပြောင်းသွားအောင် ရေဘူးတိုက်၊ ကစားစရာ လက်ထဲထည့်ပေးပေမယ့် သမီးလေးက ဘွားဘွားကြီးကိုပဲ ချောင်းချောင်းကြည့်ပြီး အော်အော်ငိုတာ ကားပေါ်က လူတွေကလည်း ကျမတို့ကို ကွက်ကြည့် ကွက်ကြည့်နဲ့ပေါ့။ ကလေးက အော်ငိုလွန်းမက ငိုတော့ ဘွားဘွားကြီးလည်း သူ့မျက်နှာကို လက်ကိုင်ပုဝါလေးနဲ့ အုပ်ပြီး ကာထားရှာပါတယ်။ အဲဒါလည်း ဒီက ဂျစ်တူးမလေးက မရပါဘူး။ ကျမလည်း ဘွားဘွားကြီးကိုရော ကားပေါ်က လူတွေကိုပါ အားနာလာတဲ့အပြင် သိပ်မကြာခင်မှာ အိမ်နားရောက်တော့မှာမို့ ကလေး အငိုတိတ်အောင် မတ်တပ်ရပ်ပြီးပဲ ချီထားလိုက်ပါတယ်။ အဲဒါ ဘွားဘွားကြီးက သူ့ကြောင့် ဖြစ်တာလို့ ထင်တယ်နဲ့ တူပါရဲ့။ ကျမကို ထိုင်ခိုင်းပြီး သူ မတ်တပ်ရပ်ပေးပါ့မယ်လို့ ပြောလုိ့ ကျမက ပြန်ပြီး အားနာရပါသေးတယ်။ ကျမလည်း ဘွားဘွားကြီးကို တောင်းပန်ပြီး နောက်တစ်မှတ်တိုင်ဆို ဆင်းတော့မှာလို့ ပြောလိုက်ပါတယ်။

ကားပေါ်က ဆင်းပြီး အိမ်ပြန်ရောက်တော့လည်း သမီးလေးက ရီမောပြီး ပျော်ရွှင်နေပြန်ပါရော။ ကျမတို့ ထင်တာကတော့ သမီးလေးက ဆရာဝန်မကြီးကို မှတ်မိသွားတဲ့ပုံစံပါပဲ။ အဲဒါဆိုတော့ ဆရာဝန်မကြီးနဲ့ ဆင်တူ တဲ့သူတွေ့ရင် သူ သတိရပြီး အော်ငိုတယ်လို့ ထင်မိပါတယ်။ နောက်ပိုင်းလည်း အကြောင်းတစ်ခုခုကြောင့် ဆေးခန်း သွားရပြီဆို သမီးလေးက သူ့ကို ဘာမှ မလုပ်ရသေးခင် ဆရာဝန်မကြီး မြင်တာနဲ့တင် ရှိုက်ကြီးတငင် ငိုနေတတ်ပါတယ်။ အမှန်တော့ ဒီအကြောင်းက ကာကွယ်ဆေးထိုးတာနဲ့ ဘယ်လိုမှ မပတ်သက်ပေမယ့် နောက်ဆုံးအကြိမ် ကာကွယ်ဆေး ထိုးခဲ့တုန်းက ဖြစ်ခဲ့တာလေးမို့ အမှတ်တရ ရေးထားလိုက်တာပါ။

ကာကွယ်ဆေးထိုးပြီးတိုင်း ဆေးအရှိန်နဲ့ သမီးလေး ဖျားနာမှာကိုပဲ စိတ်ပူမိပါတယ်။ ကလေးက ဆေးထိုးပြီး ညနေလောက်ဆို အမေကို ကပ်ပြီး နည်းနည်း ဂျီကျတတ်တယ်။ ဆေးအရှိန်နဲ့ မအီမသာဖြစ်တယ်လို့ ထင်ရတာပါပဲ။ နောက်ရက်တွေဆိုရင်တော့ ရီမောပြီး ပုံမှန်အတိုင်း သူ့ဘာသာ ဆော့ကစား နေတာမို့ စိတ်အေးရပြန်တယ်။ နောက်ပြီး ဆေးထိုးပြီး မခြေရတော့ လက်မောင်းက ဆေးထိုးထားတဲ့ နေရာကို စမ်းလိုက်ရင် အဖုလေးက တော်တော်နဲ့ မပျောက်ပါဘူး။ ၁ လကျော်လောက် ကြာတော့မှ ပျောက်သွားတော့တယ်။


DPT ကာကွယ်ဆေး ထိုးထားတဲ့မှတ်တမ်းပါ။

နိုဝင်ဘာ ၃၊ ၂၀၁၀

October 18, 2010

သမီးလေး ၉ လပြည့်


သမီးလေးရဲ့ လစဉ် ကိုယ်အလေးချိန်နဲ့ အရပ်ကို ဆွဲထားတဲ့ Graph

မေမေ့သမီးလေးလည်း ဘာလိုလိုနဲ့ ၉ လတောင်ပြည့်သွားပြီနော်။ ပြီးခဲ့တဲ့ ၁၄ ရက်နေ့က ပေါင်ချိန်တော့ သမီးလေးရဲ့ ကိုယ်အလေးချိန်က ၇.၅ ကီလိုနဲ့ အရပ်က ၆၉.၅ စင်တီမီတာဖြစ်လာပြီ။ ၆ လပြည့်ပြီးတဲ့ နောက်ပိုင်းမှာ သမီးရဲ့ တိုးတက်မှုတွေက အရမ်းကို မြန်လာတယ် လို့တောင် ပြောလို့ရတယ်။ အဓိက သမီးရဲ့ ဦးနှောက်ဖွံ့ဖြိုးမှုနဲ့ လှုပ်ရှားမှုတွေပါပဲ။ ကိုယ်အလေးချိန်ကတော့ တစ်လကို အကြမ်းအားဖြင့် ၃၀၀ ဂရမ်လောက်ပဲ တက်တယ်လို့ ပြောလို့ရတာပေါ့။ နောက်ပြီး သမီးလေးမှာ အပေါ်သွား ၂ ချောင်းနဲ့ အောက်သွား ၂ ချောင်းလည်း ပေါက်နေပြီ။ သွားပေါက်တော့ သွားဖုံးယားလို့ ဟိုဟာမြင်လည်း ကိုက်ချင် ဒီဟာမြင်လည်းကိုက်ချင်နဲ့လေ။ သွားပေါက်လာတော့ သမီးလေးကို နည်းနည်း မာတဲ့ အစားတွေ ထည့်ကျွေးရင် ၀ါးစားတတ်လာတယ်။

*****

သမီးကို မေမေက ကြမ်းပြင်ပေါ်မှာပဲ ဒီအတိုင်း ပစ်ထားတာ များလို့လား မသိဘူး။ မှောက်တတ်ပြီးတဲ့ နောက်ပိုင်း တွားသွားတာ၊ ထိုင်တာ၊ လေးဘက်ထောက်တာ၊ မတ်တပ်ရပ်တတ်တာတွေကို ဆက်တိုက် ဆိုသလို သမီးလေး လုပ်နိုင်လာတယ်။ စပြီး တွားသွားတတ်တော့ ၆ လကျော်လောက်ကပေါ့။ အစပိုင်းတော့ ဝေးဝေးလံလံ သွားတာ မဟုတ်ပါဘူး။ အိပ်ယာပေါ်တင်ပဲ ခေါင်းရင်းသွားလိုက်၊ ခြေရင်းသွားလိုက်နဲ့ပဲ။ သိပ်မကြာဘူး အိပ်ခန်းနဲ့တွဲတဲ့ မီးဖိုဆောင်ဘက် အထိကို ကူးပြီး သွားတတ်လာတယ်။ နောက် တဖြည်းဖြည်းချင်း အားယူပြီး ထိုင်ဖို့ကြိုးစားတော့တာပဲ။


သမီးလေးအတွက် အမှတ်တရ (၇ လကျော်)

တပတ်ကျော်လောက်ပဲ ကြာပါတယ်။ သမီးလေး ကောင်းကောင်းထိုင်တတ်သွားတယ်။ ၈ လ မပြည့်ခင်မှာ ခုံကို ကိုင်ပြီး မတ်တပ်ရပ်နိုင်နေပြီ။ ထမင်းစားခုံ၊ တီဗွီခုံလိုမျိုး အပြင် မေမေ့ အနောက်ကနေ ထမီကို အားယူ ကိုင်ပြီး မတ်တပ်ရပ်နိုင်လာတယ်။ မတ်တပ်ရပ်လို့ ညောင်းလာရင်လည်း ပြန်ထိုင်ချတတ်တယ်။ အရင်တုန်းကတော့ အဖွားကြီး ပေါက်စလေးလိုပဲ ထိုင်တာ ထတာတွေက တုန်ချိ တုန်ချိနဲ့လေ။ ကောင်းကောင်းလဲ မထိုင်တတ် မထတတ်တဲ့အပြင် ကိုယ့်ကိုကိုယ်လည်း မထိန်းနိုင်တော့ လဲတာလည်း ခဏခဏပေါ့။ အဲဒါဆိုတော့ သမီးလေးမှာ ကြမ်းပြင်နဲ့ ခေါင်း စောင့်မိရတာနဲ့၊ ကြမ်းပြင်နဲ့ နဖူး နဲ့ စောင့်မိရတာနဲ့ ထမင်းစားခုံနဲ့ ခေါင်းကို စောင့်မိရတာနဲ့ စုံနေတာပါပဲ ။

မတ်တပ်ရပ်နိုင်ပြီး ၁၀ ရက်လောက်ကြာတော့မှ လေးဘက် ထောက်တတ်သွားတယ်။ အဲဒီနောက်ပိုင်း သမီးက တစ်နေရာရာကို သွားချင်ပြီဆို သွားချင်တဲ့နေရာကို လေးဘက်ထောက်သွားလိုက်၊ ရောက်ပြီဆို ထိုင်ချလိုက်၊ ပြီးရင် အနားက တစ်ခုခု ကိုင်ရင်း အားယူပြီး မတ်တပ်ရပ်လိုက်နဲ့ အတော်ကို ဟုတ်နေတာပါ။ အခုဆို သမီးလေးဟာ အိမ်ရဲ့ အခန်းတော်တော်များများကို လျှောက်သွားတတ်နေပြီလေ။ တစ်ခန်းလုံး လျှောက်သွားတတ်နေပြီဆိုတော့ မေမေသွားတဲ့နောက်ကို တကောက်ကောက် လေးဘက်ထောက်ပြီး လိုက်တယ်။ မေမေ့ကို မတွေ့ရင် ငိုမဲ့မဲ့မျက်နှာလေးနဲ့ လိုက်ရှာနေတတ်တယ်။ အသံကြားရာဆီ အထိ လိုက်လာပြီး မေမေ့ကို တွေ့သွားပြီ ဆိုရင်တော့ မျက်နှာလေးက ပြုံးပြီး ရီနေတာများ သွားငုတ်တုတ်လေးတွေပါ မြင်ရတယ်။ နောက်ပြီး လှေကားထစ်လိုမျိုး အဆင့်နိမ့်နိမ့်လေးတွေကိုလည်း ကြိုးစားပြီး တက်နိုင်သလို ဆင်းတော့လည်း ဖြေးဖြေးချင်း အားယူပြီး ဆင်းနိုင်နေပြီ။

ဒီရက်ပိုင်းအတွင်း အတတ်ဆန်းလာတာက ထမင်းစားခုံကို သမီးရဲ့ ဗိုက်ကလေးနဲ့ ထောက်ပြီးဖြစ်ဖြစ်၊ တင်ပါးလေးနဲ့ မှီပြီးဖြစ်ဖြစ် မတ်တပ်ရပ်တာလေ။ မေမေတို့ရဲ့ ထမင်းစားခုံလေးကလည်း နိမ့်တာကိုး။ အဲဒါအပြင် ထမင်းစားခုံပေါ်အထိပါ တက်မယ် လုပ်နေလို့ မနည်းပဲ လိုက်ဆွဲနေရတယ်။ ထမင်းစားခုံကို ကိုင်ထားရင်းနဲ့ ခြေလှမ်း နည်းနည်းချင်းစီ လှမ်းပြီး လမ်းလျှောက်ကျင့်နေပြီ။ နောက်ပြီး သမီးလေးက ကိုင်ထားတဲ့ ခုံကို လက်လွတ်ပြီး မတ်တပ်ရပ်တာကို စ ကျင့်နေပြီ။ အကြာကြီးတော့လည်း မရပ်နိုင်သေးပါဘူး။ ဒီပုံစံအတိုင်းဆို သိပ်မကြာခင်မှာ သမီးလေး လမ်းလျှောက်တတ်တော့မယ် လို့ ထင်ရတာပါပဲ။

နောက်တစ်ခုက သမီးရဲ့ လက်လှုပ်ရှားမှုလေးတွေပေါ့။ လက်တွေကို မြှောက်ပြီး ဆော့တယ်။ သမီးရေ "ချိုမိုင်မိုင်" လို့ ပြောလိုက်ရင် လက်ချောင်းလေးတွေကို ဆုပ်လိုက်ဖြန့်လိုက်နဲ့ လုပ်ပြတတ်တယ်။ စိတ်ပါတဲ့နေ့ဆို ပါပါး ရုံးသွားခါနီးရင် "တာတာ့" ပြပြီး နှုတ်ဆက်တတ်တယ်။ အခုတလောတော့ ရွှေလက်ခုပ်ကို တော်တော်သဘောကျနေပုံပဲ။ သဘောကျစရာ ရီစရာ တွေ့မြင်ရရင် လက်ခုပ်ကလေး တီးပြီးကို အားရပါးရ ရီတာလေ။

၈ လကျော်လာတဲ့ နောက်ပိုင်း သမီးက တချို့စကားလုံးတွေကို အသံထွက်တတ်လာတယ်။ သမီးကို မေမေက "ပါပါး" ဆိုပြီး ပြောပြလိုက်ရင် သမီးကပါ "ပါပါး" ဆိုတာကို ပီပီသသ အသံထွက်တတ်နေပြီ။ အဓိပ္ပာယ်တော့ သမီး သိပုံမရပါဘူး။ ဒါကြောင့် ပါပါးက သူ့ကိုယ်သူ လက်နဲ့ ပုတ်ပြီး "ပါပါး" လို့ သင်ပေးနေရတယ်။ နောက်ပြီး "ပါ" တို့ "ဘာ" တို့လို အသံထွက်တွေကို သမီးပါးစပ်ကနေ ရွတ်နေတတ်တယ်။ အိပ်ချင်လို့ပဲဖြစ်ဖြစ် အမေကို မတွေ့လို့ ငိုရင်ပဲဖြစ်ဖြစ် "အမေရေ.. မေမေရေ" လို့ အော်ခေါ်နေသလိုမျိုး ပါးစပ်ကနေ အော်နေတတ်တယ်။ တစ်ခါတလေလည်း သမီးလေး ပါးစပ်က ၀ူးဝူးဝါးဝါးနဲ့ ဘာတွေ ပြောနေမှန်းမသိအောင် စကားတွေ ပြောနေတတ်ပြန်တယ်။ ပြီးတော့ လူကြီးတွေကို ဂျစ်တိုက်ချင်ရင် အသံစူးစူးလေးနဲ့ "အား" ဆိုပြီး ကုန်းအော်တတ်တယ်။

သမီးလေး တွားသွားတတ်လာပြီဆိုကတည်းက သမီးလေး အန်းမက မေမေ့ကို သတိပေးတယ်။ ပစ္စည်းတွေကို အရင်လို လက်လွတ်စပယ် မထားဖို့၊ ဒီအရွယ်ဟာ လူကြီးမမြင်တဲ့ ပစ္စည်းကို ကလေးတွေက အမြင်စူးရှပြီး ပါးစပ်ထဲ နှာခေါင်းထဲ ကောက်ထည့်တတ်တဲ့ အရွယ်ဖြစ်လို့ သမီးလေးကို အရင်ကထက် ပိုဂရုစိုက်ဖို့ ၊ ပိုက်ဆံအကြွေတွေကို သမီးလေး မမြင်အောင် ထားဖို့ သေချာမှာရှာတယ်။ သမီးလေး အန်းမ သတိပေးတဲ့ အတိုင်းပါပဲ။ သမီးက တွေ့သမျှ မြင်သမျှကို ပါးစပ်ထဲ ကောက်ထည့်တယ်။ လျှာနဲ့ လျက်ကြည့်တယ်။ ပြီးရင် တမြုံ့မြုံ့နဲ့ ၀ါးစားနေရော။ စာရွက်တွေ၊ တစ်ရှုးတွေကို သမီးက အရမ်းကြိုက်တယ်။ အဲဒါတွေနဲ့ ဆော့နေရမယ်ဆို အသံမထွက်ပဲကို ငြိမ်ပြီးဆော့တာ။ နောက်ပြီး ပလပ်ခေါင်းတွေ၊ ၀ါယာကြိုးတွေကိုလည်း အထူးအဆန်းအနေနဲ့ စိတ်ဝင်တစား ကိုက်ပြီး ဆော့တတ်တယ်။ ဒါကြောင့် သမီးလေး အရမ်းငြိမ်နေရင်လည်း မေမေ့မှာ သတိထားပြီး ကြည့်ရသေးတယ်။



*****

အခုနောက်ပိုင်း သမီးလေးဟာ အရမ်းစပ်စုချင်လာတယ်။ စူးစမ်းတာတွေလည်း များလာတယ်။ သမီးက ကိုင်ဖူးတဲ့ ပစ္စည်းလား မကိုင်ဖူးသေးတဲ့ ပစ္စည်းလားဆိုတာ ကောင်းကောင်းခွဲခြားတတ်တယ်။ မကိုင်ဖူးသေးတဲ့ ပစ္စည်းဆို သမီးအတွက် အထူးအဆန်းတွေဖြစ်ပြီး နှစ်ရက်လောက်က အဲဒီ ပစ္စည်းလေးနဲ့ အလုပ်ရှုတ်ပြီး ငြိမ်နေတတ်တယ်။ အဲဒါပြီးရင် ရိုးသွားလို့ သိပ်စိတ်မ၀င်စားတော့ဘူး။ သမီးလေး ကိုင်ဖူးတဲ့ ပစ္စည်း ဆိုရင်တော့ တချက်လောက် ကြည့်ပြီး ဖတ်ခနဲဆို ကောက်လွှင့်ပစ်လိုက်တာ။ နောက်ပြီး ခုံပေါ်တင်ထားတဲ့ ပစ္စည်း၊ စင်ပေါ်တင်ထားတဲ့ ပစ္စည်းတွေကိုလည်း လက်လှမ်းမီသမျှ အကုန်အောက်ဆွဲချတယ်လေ။ ဒါကြောင့် မေမေတို့လည်း စာအုပ်၊ စက္ကူနဲ့ သမီးအတွက် အန္တရာယ်ဖြစ်စေနိုင်မယ့် ပစ္စည်းတွေ မှန်သမျှ သမီးလေး မမြင်အောင် ကာထား ဖွက်ထား ရတာပေါ့။

တီဗွီက ကြော်ငြာအစီအစဉ်ကိုလည်း သမီးက ကြိုက်မှ ကြိုက်ပဲ။ ထမင်းစားရင်း ကြော်ငြာလာလို့ကတော့ ဘယ်မှလည်း လှည့်မကြည့်ဘူး။ မေမေ့ကိုလည်း ဂရုမစိုက်ဘူး။ မျက်တောင်မခတ်ပဲ တီဗွီကို စိုက်ကြည့်နေတာ။ အဲဒီအချိန် မေမေက ထမင်းခွံ့ချင်လို့ ဇွန်းက သမီးလေး ပါးစပ်နား ရောက်လာရင်တော့ ပါးစပ်လေးကို ဟ ပေးလိုက်တယ်၊ မျက်လုံးကတော့ တီဗွီမှာပဲ။ တစ်ခါတလေ မေမေ့လက်က သမီးကို ကွယ်မိသွားရင် လက်ကို ပုတ်ထုတ်တယ်လေ။ ကွယ်နေတယ် ဖယ်ပေး ဆိုတဲ့သဘောပေါ့။ အဲဒါ ကြော်ငြာ ပြီးတော့မှ အာရုံက တခြားကို ပြောင်းတော့တယ်။ နောက်ပြီး မေမေ့ပေါင်ပေါ်မှာ မှေးမှေးအိပ်ရင်းက ကြော်ငြာလာတဲ့အသံကြားရင် ချက်ချင်းကို ခေါင်းထောင်ပြီး ကြည့်တယ်။ ကြော်ငြာပြီးတာနဲ့ ဖုတ်ခနဲ ခေါင်းကို ပစ်လှဲချပြီး ချက်ချင်း အိပ်ပျော်သွားပြန်ရော။ သမီးက ကြော်ငြာနဲ့ ရိုးရိုး အစီအစဉ်ကို ခွဲခြားတတ်တာ မေမေနဲ့ပါပါးက လက်ဖျားခါရတယ်။ ဘယ်လိုမှတ်ထားလဲတော့ မသိဘူး။ ကြော်ငြာလာပြီဆို ရောက်နေတဲ့ နေရာကနေ ခေါင်းပြန်ပြီး လှည့်ကြည့်တာမျိုး၊ တီဗွီရှေ့ကို တွားသွားပြီး ကြည့်တာမျိုး၊ ဆိုဖာပေါ်ကနေ ဖားလေးလို ကုန်းပြီး ကြည့်တာမျိုးလည်း ရှိသေးတယ်။ သဘောကျတဲ့ ကြော်ငြာလာလို့ကတော့ ဂျပန်စကားပဲ နားလည်သလိုလို ဘာလိုလိုနဲ့ လက်ခုပ်ကလေး တီးရင်း သဘောတွေကျပြီး ရီတောင် ရီနေလိုက်သေးတယ်။



သမီးက တချို့ဟာတွေဆို သင်မပေးပဲ သူ့ဘာသာသူ တတ်လာတာမို့ လူကြီးတွေက အံ့သြရတယ်။ မှတ်မှတ်ရရ မေမေ့မွေးနေ့မှာ သမီးက မေမေ့ပါးကို နှာခေါင်းလေးနဲ့ ရွှတ်ကနဲ ဆိုပြီး စ နမ်းတယ်လေ။ မျက်နှာကို သေချာ ကိုင်ပြီး နမ်းတာမို့ မေမေ့မှာ သမီး နမ်းတတ်တာမှ ဟုတ်ရဲ့လားလို့တောင် အံ့သြမိတယ်။ ဒါကြောင့် သေချာအောင် နောက်တစ်ခါ ထပ်လုပ်ခိုင်းတော့ သမီးက ပြန်လုပ်ပြရှာတယ်။ သမီးရဲ့ ပထမဆုံးအနမ်းက ပါပါးရော မေမေပါ ဘယ်လောက်ပျော်ပြီး ကြည်နူးရသလဲဆိုတာ ပြောမပြတတ်အောင်ပါပဲ။ နောက်ပိုင်းတော့ သမီးက လူလည်လေး ဖြစ်သွားပြီ။ "သမီးရေ kiss ပေးပါဦး" ဆို စိတ်ပါမှပဲ ပေးတော့တယ်။ စိတ်မပါရင်တော့ မေမေတို့ မျက်နှာနား ကပ်လာပြီးမှ ခေါင်းလေးကို ချာကနဲ နေအောင် တဖက်ကို လှည့်ပစ်လိုက်တယ်လေ။ စိတ်မထင်ရင်တော့ မေမေ့ မျက်နှာနားအထိ ကပ်လာပြီး နှာခေါင်းကို ဆတ်ခနဲ ကိုက်ပစ်လိုက်တာ။ ဒါပေမယ့် မှန်ရှေ့ရောက်ရင်တော့ မှန်မှာ ပေါ်တဲ့ ကိုယ့်မျက်နှာကို ကြည့်ပြီး သဘောကျလို့ တရွှတ်ရွှတ်နဲ့ မှန်ကို ကုန်းပြီး နမ်းရတာ အမော။

*****

နောက်ပြီး သမီးက မအိပ်ခင်ဆို အရမ်းဆော့တာ။ ၆ လ မတိုင်ခင်ကတော့ မေမေက သီချင်းဆို သိပ်လိုက်ရင် သိပ်မကြာဘူး သမီးလေး အိပ်ပျော်သွားရော။ အခုနောက်ပိုင်းတော့ အိပ်ဖို့ အိပ်ယာပေါ်ရောက်ရင် သမီးက နှစ်ပတ် သုံးပတ်လောက် စိတ်ကြိုက် လှိမ့်လိုက်သေးတယ်။ ပြီးတော့ ဟိုနားလျှောက်သွား၊ ဒီနားလျှောက်သွား၊ လျှောက်ဆော့နဲ့ အားရအောင် ဆော့ပြီး မောတော့မှ အိပ်ပျော်သွားတော့တယ်။ အိပ်ရင်လည်း အရင်လို ငြိမ်ငြိမ်မအိပ်တော့ဘူးလေ။ အိပ်ရင်းနဲ့ လူးလိမ့်နေတာ အိပ်ယာတစ်ခုလုံး သမီးအတွက် ပေးထားရတဲ့ နေရာက ပိုများတယ်။ နောက်ပြီး အိပ်ယာက နိုးတာနဲ့ ချက်ချင်း ကုန်းထပြီး ထိုင်တော့တာပဲ။ အဲဒီအခါမျိုးမှာ မေမေက သမီးလေးကို လှဲချပေးပြီး ပြန်အိပ်ခိုင်းရတယ်။ နို့မို့ဆို သမီးက ပြန်မအိပ်တော့ပဲ လျှောက်ဆော့နေတာ မေမေပါ ထပြီး သမီးကို စောင့်ကြည့်ရတယ်။

အခုဆို သမီးကို အင်္ကျီလဲပေးရတာ၊ nappy လဲပေးရတာ အရမ်းခက်တာပဲ။ သမီးက အငြိမ်မှ မနေတော့တာကိုး။ သမီးကို nappy လဲပေးဖို့ ဆိုဖာပေါ်လှဲချလိုက်ရင် ချက်ချင်းပြန်မှောက်ပြီး ကုန်းထတော့ ဘာမှ လုပ်လို့မရဘူးပေါ့။ အဲဒါဆိုတော့ မေမေက သမီးလေး မတ်တပ်ရပ်လျက်က nappy လဲတတ်အောင် ကြိုးစားရတော့တယ်။ အဲဒါမှမဟုတ်လည်း သမီးကို ပစ္စည်း တစ်ခုခု ပေးဆော့ထားပြီး ခပ်မြန်မြန် လဲပေးရပြန်တယ်။ တစ်ခါတလေလည်း သမီးကို ပါးစပ်ထဲ ရသမျှ ကဗျာတွေ ရွတ်ပြပြီး အာရုံပြောင်းရင်းက လဲပေးရတယ်။ နောက်ပြီး သမီးက မကျေနပ်ဘူး၊ မကြိုက်ဘူးဆို အော်ငိုပြီး ကိုယ်ကြီးကို ကော့ထိုးတတ်တာမို့ သတိထားရသေးတယ်။

*****

မွေးခါစတုန်းကလည်း လသားအရွယ် နီတာရဲလေးမို့ စိတ်ပူရသလို အခု ၉ လအရွယ်ရောက်ပြန်တော့လည်း သမီးလေး ချော်လဲမှာ၊ ခေါင်းနဲ့ ကြမ်းပြင် စောင့်မိမှာ၊ မျက်နှာနဲ့ ခုံစောင်းနဲ့ ရိုက်မိမှာ၊ မျက်လုံးနဲ့ အချွန်တခုခုနဲ့ သွားထိုးမိမှာ၊ ခုံပေါ်အားယူတက်ရင်း ပြုတ်ကျမှာ စသည်ဖြင့် မေမေတို့မှာ သမီးကို စိတ်ပူရပြန်တယ်။ တတ်နိုင်သလောက် သမီးကို လိုက်ကြည့်ပေးပြီး အနာတရ မဖြစ်အောင် ဂရုစိုက်နေပေမယ့် အချိန်ပြည့် မကြည့်နိုင်တော့လည်း သမီးလေးမှာ ထိခိုက်ဒဏ်ရာတော့ ရတာပါပဲ။ ဒါပေမယ့် သမီးလေး အခုလို ကျန်းကျန်းမာမာနဲ့ လစဉ် ပုံမှန် ဖွံ့ဖြိုးတိုးတက်မှုတွေကို မြင်ရတော့ ပူပင်တာတွေလျော့ပြီး စိတ်သက်သာရပြန်တယ်။

ဒီကြားထဲ သမီးလေးက အမေကို မျက်စေ့အောက်က အပျောက်မခံတော့ တစ်ခါတလေ မေမေ့မှာ စိတ်ရော လူပါ ပင်ပန်းတယ်လို့ တွေးမိတယ်။ အဲဒီအတွေးကလည်း သိပ်မကြာလိုက်ပါဘူး၊ သမီးလေးရဲ့ ခိုးခိုးခစ်ခစ် ရီမောသံလေးတွေ၊ ချစ်စရာ အပြုအမူလေးတွေအောက်မှာ အားလုံးပျောက်ဆုံးကုန်ပြီး ပင်ပန်းခဲ့သမျှ အမောတွေ ပြေကုန်တာပါပဲ။

အောက်တိုဘာ ၁၈၊ ၂၀၁၀။

October 8, 2010

Flower Arrangement - Sep 30, 2010



ပန်းအလှပြင်တာနဲ့ပတ်သက်ပြီး ရေးစရာစာကြွေး ၃ ပုဒ်တောင် ရှိနေပါတယ်။ ၂၀၀၉ ခုနှစ် စက်တင်ဘာ၊ ဒီဇင်ဘာ နဲ့ ၂၀၁၀ ခုနှစ် စက်တင်ဘာလမှာ လုပ်ဖြစ်ခဲ့တဲ့အကြောင်းတွေပါ။ ၂၀၀၉ ခုနှစ်က လုပ်ဖြစ်ခဲ့တာတွေကိုတော့ ဓာတ်ပုံပြန်ရှာရဦးမှာမို့ ဖြည်းဖြည်းချင်းမှ ပြန်ရေးပြီး တင်ပေးပါ့မယ်။
အခုရေးမှာက စက်တင်ဘာလ ၃၀ ရက်နေ့တုန်းက လုပ်ဖြစ်ခဲ့တာပါ။ ၂၀၁၀ ခုနှစ်ထဲမှာ ကျမအတွက် ပထမဆုံး ပန်းအလှပြင်ဖြစ်တယ် လို့လည်း ပြောလို့ရပါတယ်။ ရုံးမှာတော့ ဖေဖော်ဝါရီနဲ့ မေလမှာ ပန်းအလှပြင်ပွဲတွေ ဆက်တိုက် လုပ်ဖြစ်ပေမယ့် ကျမ မပါဝင်ဖြစ်ခဲ့ဘူး။ အခုတစ်ခါ ပန်းအလှပြင်တာက ရုံးအနေနဲ့တော့ ၃၅ ကြိမ်မြောက် ဖြစ်ပြီး ကျမအတွက်တော့ ၁၁ ကြိမ်မြောက်ပါ။

*****

ပါဝင်တဲ့ ပစ္စည်းတွေကတော့ ပုံမှာ ပြထားသလိုပါပဲ။ ပန်းတွေကတော့ နှင်းဆီပန်း ပန်းဆီရောင် အပွင့်ကြီး ၃ ပွင့်၊ နှင်းဆီအဖူး အပွင့်သေး ၄ ပွင့်၊ ရွှေရောင်စိမ်ထားတဲ့ ပန်းအခြောက် လက်တစ်ဆုပ်၊ ကြက်သွေးရောင် စိမ်ထားတဲ့ ပန်းခြောက်အခက် ၂ ခက်၊ အညိုရင့်ရောင်လဲ့လဲ့လေးတွေ ပါတဲ့ ပန်းအခြောက် ၁ ခက် တို့ ပါ ပါတယ်။


ပန်းဘေးကနေ ရံပြီး အလှဆင်တဲ့ ပစ္စည်းတွေကတော့ ခရမ်းရောင် အလုံးလေး ၆ လုံး၊ ရွှေရောင် အသည်းလေး တစ်ခု (အသည်းကိုတော့ ကိုယ်ကြိုက်နှစ်သက်ရာ အရောင်ရွေးလို့ရပါတယ်။)၊ ဖဲကြိုး အကြီး အ၀ါရောင် နိုင်လွန်ဇာနဲ့ ၁ ခု၊ ရွှေအိုရောင် ဖဲကြိုး အသေး ၁ ခု၊ ရွှေအိုရောင် အလုံး ၂ လုံး (အရောင် လက်လက်တစ်ခု၊ မှိန်တာ တစ်ခု)၊ ပန်းခြင်း၊ ဖော့တုံး၊ နောက်ပြီး နန်းကြိုးမျှင်ရယ် ကော်စက္ကူရယ် လည်းလိုပါသေးတယ်။ Halloween နားနီးနေတာကြောင့် ပန်းပြင်တော့လည်း ပန်းအရောင်တွေကို ခပ်မှိုင်းမှိုင်းသုံးပြီး ပြင်ထားပါတယ်။ ဒီတကြိမ်မှာလည်း ပန်းအခြောက် (preserved flowers) တွေနဲ့ လုပ်ရတာမို့ အချိန်အရမ်းကြာပါတယ်။



အရင်ဆုံး ဖဲကြိုးအကြီးကို ပန်းအိုးအရွယ်နဲ့တိုင်းပြီး အ၀ိုင်းပုံစံဖြစ်အောင်လုပ်ယူပါတယ်။ ဖဲကြိုးရဲ့ အနားနှစ်ဘက်မှာ နန်းကြိုးမျှင် ပါတာမို့ တစ်ဖက်မှာ ရှိတဲ့ နန်းကြိုးမျှင်ကို အသားလေး ဆွဲစုပြီး ကိုယ်လိုချင်တဲ့ အတိုင်းရပြီဆို အစ နှစ်ဘက်ပူးချည်လိုက်တာပါပဲ။ ပြုတ်မထွက်အောင် ကော် (မီးအပူပေးထားတဲ့ ကော်ချောင်း) နဲ့ ကပ်ယူလိုက်ပါတယ်။



ပြီးရင် စောစောက လုပ်ထားတဲ့ ဖဲကြိုးအ၀ိုင်းကို ပန်းခြင်းထဲမှာ သင့်သလို နေရာချပါတယ်။ ဖဲကြိုးအ၀ိုင်းရဲ့အလယ်ခေါင်မှာ ဖော့တုံးကို ထည့်လိုက်ပါတယ်။ ပန်းခြင်းကို ကြည့်လိုက်ရင် အလယ်က ဖော့တုံးမပေါ်အောင် ဖဲကြိုးခံပြီး ဘေးက ကာထားတဲ့သဘောပါ။ ပန်းခြင်းထဲမှာ ဖဲကြိုးနဲ့ ဖော့တုံးကို စိတ်ကြိုက်ပြင်ပြီးပြီဆိုရင် နေရာမရွေ့သွားအောင် ကော်နဲ့ ကပ်ပါတယ်။ အဲဒါဆိုရင် ပန်းခြင်းအပိုင်းက ပြီးသွားပါပြီ။



ပန်းခြင်းထဲမှာ ထိုးမယ့် ပန်းအဆုပ်၊ အခက်တွေကို ထုံးစံအတိုင်း အခက်အသေးတွေဖြစ်အောင် ညှပ်ပြီး နန်းကြိုးနဲ့ ချည်ပါတယ်။ ပြီးမှ အပေါ်က တိပ်နဲ့ ကပ်ပါတယ်။ နှင်းဆီပန်းအပွင့်သေး ၂ ပွင့်နဲ့ ခရမ်းရောင် ပုလဲလုံး ၆ လုံးကိုလည်း ပန်းအခက်တွေလိုပဲ နန်းကြိုးနဲ့တွယ်ပြီး တိပ်နဲ့ကပ်ထားပါတယ်။



ကျမကတော့ စောစောက လုပ်ခဲ့တဲ့ ပန်းအခက်လေးတွေထဲက တချို့တ၀က်ကို တဆင့်ချင်းဆီ တိပ်နဲ့ကပ်ပြီး အောက်မှာ ပြထားသလိုမျိုး ပန်းအခက်ကြီး ပုံစံရအောင် ပြင်ယူပါတယ်။ အဲဒီလို ပန်းခက်မျိုး ၂ ခက် လုပ်ထားပါတယ်။ ပန်းအခက်ကြီးကို ၁ ခက်ပဲ လုပ်တဲ့သူရှိသလို လုံးလုံး မလုပ်တဲ့သူလည်း ရှိပါတယ်။ ကိုယ့်စိတ်ကူးနဲ့ ကိုယ်ပေါ့။



ပြီးရင် ပန်းအခက်ကြီး ၂ ခက်ကို ပန်းခြင်းရဲ့ ကိုင်းနားမှာ ကပ်ပြီး ဖော့တုံးမှာ ထိုးစိုက်ပါတယ်။ ပန်းအခက်က ပန်းအိုးကိုင်းမှာ တွယ်နေသလိုမျိုး ဖြစ်အောင် ပန်းခြင်းကိုင်းမှာလည်း ကော်နည်းနည်း သုပ်ပြီးမှ ပန်းခက်ကို ကပ်လိုက်တာပါ။


ပန်းအခက်တွေ အားလုံး ပြင်ဆင် ပြီးသွားရင် နှင်းဆီပန်းတွေကို ဖော့တုံးမှာ အရင် ထိုးစိုက် နေရာချပြီးမှ ဘေးက အရံပန်းတွေ လိုက်ဖြည့်ထိုးလိုက်တာပါပဲ။ နောက်ဆုံးကျမှ အသည်းပုံကို ပန်းခြင်းအလယ်မှာ တွဲလောင်းလေး ချိတ်လိုက်ပါတယ်။ တချို့ကတော့ အသည်းကို ပန်းအိုးထဲ ထည့်ပြီး ပြင်ကြတယ်။ ဒီပန်းခြင်းလေးက စင်ပေါ်မှာ တင်ထားလို့ရသလို ချိတ်နဲ့ ချိတ်ပြီး တွဲလောင်းထားလို့လည်း ရပါတယ်။ စာရေးထားတာကို ဖတ်ရတာထက် ဓာတ်ပုံကြည့်လိုက်ရင် ပိုပြီး မြင်လွယ်မယ်လို့ ထင်ပါတယ်။


ဒီပုံက ကျမ ပြင်ထားတာပါ။


ဒါကတော့ ဆရာမပြင်ထားတာ။ ဆရာမ သုံးတဲ့ ပန်းရော ပန်းအိုးရောက ကျမတို့ သုံးတာနဲ့ မတူပါဘူး။


ဒီပုံကတော့ ရုံးက တစ်ယောက် ပြင်ထားတာပါ။ အားလုံးကို ယှဉ်ကြည့်လို့ရအောင် တခြားသူတွေရဲ့ လက်ရာကိုပါ တင်ပေးလိုက်ပါတယ်။

အောက်တိုဘာ ၉၊ ၂၀၁၀။

September 13, 2010

သမီးဖတ်ဖို့ (၂၀၀၉ ခုနှစ် ဇွန်-ဇူလိုင်လ)

ဇွန်လ ၈ ရက် ကျတော့ ပါပါးနဲ့ မေမေလည်း ဆေးရုံက ဆရာမလေး ပြောတဲ့အတိုင်း ရပ်ကွက်ရုံးမှာ "မိခင်နဲ့ ကလေး မှတ်တမ်း စာအုပ်" နဲ့ "discount coupon" စာအုပ်တွေ သွားထုတ်လာခဲ့တယ်။ ရပ်ကွက်ရုံးက ပေးလိုက်တဲ့ စာရွက်စာတမ်းတွေကတော့ အများကြီးပါပဲ။ တချို့စာရွက်တွေက ကလေးမွေးပြီးမှ သုံးရမှာတွေလည်း ပါတယ်။ ဘယ်စာရွက်ကို ဘယ်တော့၊ ဘယ်လို သုံးရမလဲ ဆိုတာ ရပ်ကွက်ရုံးက ၀န်ထမ်းတစ်ယောက်က မေမေတို့ကို သေချာ ရှင်းပြပေးတယ်။ နောက်ပြီး ကိုယ်ဝန်ဆောင်သည်တွေ အတွက် ဖွင့်ထားတဲ့ သင်တန်းတွေကို အချိန်ရရင် လာတက်ကြည့်ဖို့လည်း မှာလိုက်သေးတယ်။ သင်တန်းတွေက အလကား တက်ရပေမယ့် မေမေလည်း ရုံးချိန်ဖျက်ပြီး သွားရတာ အဆင်မပြေတာမို့ မတက်ဖြစ်ခဲ့ဘူး။

နောက်ပြီး သမီးလေး ကိုယ်ဝန်စရှိကတည်းက သွားနေကျ ဂျပန်စာ သင်တန်းကျောင်းလည်း မသွားနိုင်တော့ပဲ နားလိုက်ရတယ်လေ။ ကျောင်းက စာသင်ချိန် ၃ နာရီဆိုတော့ ထိုင်ရတာ အရမ်းပင်ပန်းပြီး စနေနေ့တစ်ရက်က ဘယ်လို ကုန်သွားမှန်း မသိလိုက်ရဘူး။ တနင်္ဂနွေကျပြန်တော့လည်း လုပ်စရာရှိတဲ့ အိမ်အလုပ်တွေ လုပ်ရသေးတာ ဆိုတော့ မေမေ့မှာ မနားရဘူး။ ဒါကြောင့် စနေနေ့တော့ ကျောင်းမသွားတော့ပဲ နားလိုက်မယ် ဆိုပြီး အိမ်အလုပ်တွေကို ပိတ်ရက်မှာ ဖြေးဖြေးချင်း ၂ ရက်ခွဲလုပ်လိုက်တော့တယ်။ လုပ်စရာရှိရင် နည်းနည်း ထလုပ်လိုက်၊ မောရင် အိပ်ယာထဲ လှဲနေလိုက်နဲ့ အတတ်နိုင်ဆုံး လူသက်သက်သာသာ ဖြစ်အောင် နေဖြစ်ခဲ့တာပေါ့။

သမီးလေး ကိုယ်ဝန် ၂လကျော် ၃ လထဲမှာ မေမေဖြစ်တာက အရမ်းအိပ်ချင်တာပါပဲ။ အမြဲတမ်း အိပ်ဖို့ပဲ စိတ်ထဲမှာရှိတယ်။ ပင်ပန်းတာ မောတာ ဖြစ်လွယ်တယ်လို့လည်း ခံစားရတယ်။ နည်းနည်းလေး လှုပ်ရှားလိုက်ရင်ကိုပဲ လူက မောပြီး နှုံးနေရော။ သမီးကိုယ်ဝန် ရှိပြီဆိုကတည်းက စက်ဘီးလည်း မစီးတော့ဘူး။ ဒါကြောင့် မနက် ရုံးသွားရင် အိမ်ကနေ ဘူတာအထိကို အိပဲ့အိပဲ့ လမ်းလျှောက်နေတာနဲ့တင် အချိန်တော်တော်ကြာတယ်။ ထမင်းစားပြီးရင် မေမေ လမ်းလည်း မလျှောက်ချင်တော့ဘူး။ ရုံးမှာလည်း နေ့လည် နေ့ခင်း ထမင်းစားပြီးရင် အိပ်ငိုက်နေတာ များတယ်။ နောက်ပြီး ဗိုက်ခဏခဏ ဆာတယ်။ အများကြီးလည်း မစားနိုင်တော့ စားချင်တာကို စားနိုင်သလောက် နည်းနည်းချင်းဆီ စားရတာပေါ့။ ဒါကြောင့် ဗိုက်ဆာတာနဲ့ ချက်ချင်း စားနိုင်အောင် ရေနဲ့ ပေါင်မုန့်လို မုန့်မျိုးကိုိ အမြဲဆောင်ထားရတယ်။ အဲဒါတွေကြောင့်လား မသိဘူး မေမေဟာ ကိုယ်ဝန်ဆောင်သည်တွေ ဖြစ်လေ့ဖြစ်ထရှိတဲ့ morning sickness ဆိုတာကို မခံစားလိုက်ရဘူး။ မူးခြင်း အန်ခြင်း မရှိတဲ့အတွက် ပုံမှန်မှ ဟုတ်ရဲ့လားလို့တောင် တွေးမိတယ်။ စာအုပ်ထဲမှာ တချို့လည်း morning sickness မဖြစ်ကြဘူး လို့ရေးထားတာ ဖတ်ရတော့မှ စိတ်အေးရတယ်။ နောက်ပြီး မေမေက ရုံးမှာ ထိုင်ရတာ များတော့ ခါးလည်း ခဏခဏ နာတယ်။ ထိုင်ခုံကြောင့်လား ထိုင်တဲ့ပုံစံမမှန်လို့ပဲလားတော့ မသိဘူး။

ကိုယ်ဝန် လနုတုန်းတော့ အစားအသောက်လည်း မပျက်လိုလှဘူး။ ဗိုက်ဆာပြီဆို ဘာပဲ စားရစားရ စားလို့ ရသလို စားလို့လည်း ကောင်းတယ်။အမဲသား ၀က်သားလို အသားတွေ မစားချင်ပဲ ဟင်းသီးဟင်းရွက်နဲ့ အသီးအနှံပဲ စားချင်တယ်။ ဖရဲသီးနဲ့ ရှောက်ချိုသီးကို နေ့တိုင်းနီးပါး ၀ယ်စားဖြစ်ခဲ့တယ်။ ပြီးတော့ အရင်တုန်းက နွားနို့မကြိုက်တဲ့ မေမေဟာ ကိုယ်ဝန်ရှိပြီဆိုကတည်းက နွားနို့ကို နေ့တိုင်း သောက်ဖြစ်ခဲ့တယ်။ ဆေးအနေနဲ့တော့ မြန်မာပြည်က ဆရာဝန်မကြီး သောက်ခိုင်းတဲ့ folic acid ကို မနက်တစ်လုံး ညတစ်လုံး သောက်ပေးတာကလွဲပြီး တခြား ဘာဆေးမှ မသောက်ဖြစ်ခဲ့ဘူး။

ဒီလိုနဲ့ ဇွန်လ ၁၅ ရက်မှာ ရက်ချိန်းအတိုင်း OG ဆရာဝန်နဲ့ ပြဖို့ ဆေးရုံ ထပ်သွားရတယ်။ အဲဒီနေ့က ကိုယ်ဝန် ၁၀ ပတ်နဲ့ ၁ရက်ရှိတဲ့ သမီးလေးရဲ့ အရပ်ဟာ ၃၁.၇ မီလီလီတာ ဖြစ်လာပြီး ၂ ပတ်အတွင်းမှာ တော်တော်လေး သိသာလာတယ်။ ultra sound screen မှာကြည့်တော့ သမီး ကွေးကွေးလေး နေတာကိုလည်း မြင်ရတဲ့အပြင် သမီးရဲ့ ခေါင်းပိစိလေးပါ မြင်နေရပြီလေ။ ဆရာဝန်ကတော့ "ကလေးက ကြီးထွားနှုန်းပုံမှန်ပဲမို့ စိုးရိမ်စရာမရှိဘူး" လို့ မေမေတို့ကို ပြောပြတယ်။ နောက် ၂ ပတ် (ဇွန် ၂၉ ရက်) မှာ တစ်ခေါက် ထပ်လာဖို့ ရက်ချိန်းပေးခဲ့ရတယ်။ နောက်ပြီး မေမေ့ကို ကိုယ်ဝန်အတွက် သွေးဖောက်ပြီး စစ်ခိုင်းတယ်။ ဆေးစစ်တာတွေက များလို့ ဘာတွေစစ်လည်း မေမေလည်း သေချာ မမှတ်မိတော့ဘူး။ ဂျပန်လိုတွေ ရေးထားတာဆိုတော့ ဖတ်ရတာလည်း သိပ်မလွယ်လှဘူးလေ။ ဒါကြောင့် လိုအပ်တာမှန်သမျှ သူတို့ ကြည့်လုပ်ပေးမှာပေါ့ ဆိုပြီး ဆရာဝန် ရေးပေးတဲ့ ဆေးစာရွက်ကိုပဲ သွေးစစ်တဲ့ဌာနမှာ ပေးလိုက်တော့တယ်။

ဇွန်လ ၂၉ ရက်မှာ ဆေးရုံပြန်ပြတော့ သမီးက ၁၂ ပတ်နဲ့ ၁ ရက်ရှိလာပြီး အရပ်က ၆၂ မီလီလီတာ ဖြစ်လာတယ်။ ကိုယ်ဝန် ၁၂ ပတ်ရှိတဲ့အချိန်မှာ ဆရာဝန်က "ကလေးက လှုပ်ရှားတာလည်း ပုံမှန်ပဲ။ ကြီးထွားနှုန်းလည်း ပုံမှန်ပဲမို့ စိတ်ချရတဲ့ အခြေအနေကို ရောက်ပြီ" လို့ ပြောတယ်။ ultra sound result မှာလည်း သမီးရဲ့ လက်လေးတွေ ခြေထောက်လေးတွေ မြင်နေရပြီလေ။ ultra sound ရိုက်တော့ သမီးလေးက လှုပ်နေလို့ ဆရာက "Moving very well" ဆိုပြီး မေမေတို့ကို ရီပြီးပြောပြတယ်။ ဆေးရုံပြတဲ့ အပတ်တိုင်း ultra sound screen က သမီးရဲ့ ပုံရိပ်လေးက တဖြည်းဖြည်း ရုပ်လုံးပေါ်လာလေ ပါပါးနဲ့ မေမေလည်း ကလေးကို ကြည့်ပြီး ကြည်နူးရလေပဲပေါ့။ ကလေးအခြေအနေစိတ်ချရပြီဆိုတော့ ဆရာဝန်က မေမေ့ကို နောက် ၁ လ (ဇူလိုင် ၂၇ ရက်) နေမှ ဆေးရုံလာဖို့ ရက်ချိန်းထပ်ပေးလိုက်တယ်။

အဲဒီရက်မှာ ဆရာဝန်နဲ့ တွေ့တော့ ပထမတစ်ခါတုန်းက သွေးစစ်တဲ့အဖြေကို ဆရာက ရှင်းပြပေးတယ်။ သွေးစစ်တဲ့အဖြေက အားလုံးကောင်းတဲ့အပြင် ဘာမှ ပြသနာ မရှိဘူးလို့ မေမေတို့ကို ပြောတယ်။ ဒါပေမယ့် မေမေ့ရဲ့ သွေးအမျိုးအစားက "A" သွေး လို့ ဆရာဝန်က ပြောတော့ မေမေက “မဟုတ်ဘူး ငါ့သွေးအမျိုးအစားက မြန်မာပြည်မှာတုန်းက စစ်ထားတာ O သွေး” ဆိုပြီး ပြန်ပြောတာပေ့ါ။ ဘာလို့လည်းဆိုတော့ မေမေတို့ အသက် ၁၂ နှစ်မှာ မှတ်ပုံတင်လုပ်ဖို့ သွေးစစ်ကို စစ်ရတယ်။ သမီး ဘကြီး (မေမေ့အကို) ရယ်၊ မေမေရယ်က မှတ်ပုံတင် အတူတူ လုပ်တော့ သွေးစစ်တော့လည်း အတူတူ စစ်ရတာ။ အဲဒီတုန်းက ၂ ယောက်စလုံးရဲ့ သွေးအမျိုးအစားကို "O" သွေးဆိုပြီး မှတ်ပုံတင်မှာ ရေးပေးလိုက်ကြတာပဲ။ အခုမှ ဆရာဝန်က "A" သွေးဆိုတော့ မေမေလည်း နှစ် ၂၀ ကျော်လုံးလုံး ကိုယ့်သွေးအမျိုးအစားက "O" သွေးလို့ပဲ သိထားခဲ့တာမို့ ဆရာဝန်ကို “ငါ့သွေးအမျိုးအစားက O သွေး” လို့ပဲ တွင်တွင်ပြောနေမိတယ်။ ဒါကြောင့် ဆရာက သေချာအောင် သွေးအမျိုးအစား နောက်တစ်ခေါက် ထပ်စစ်ခိုင်းလိုက်တယ်လေ။ အခုတစ်ခါ ပြန်စစ်ထားတာကိုတော့ နောက်တစ်လ ရက်ချိန်းကြမှ သိရမှာပဲ။

အဲဒီလိုနဲ့ပဲ မေမေလည်း သမီးရဲ့ ကိုယ်ဝန် ပထမ ၃ လကို တဖြည်းဖြည်း ဖြတ်ကျော်လာနိုင်ခဲ့တယ်။ ကိုယ်ဝန်ဆောင်ချိန် ပထမ ၃ လဟာ မိခင်လောင်း အတွက် အရေးကြီးတဲ့အဆင့်တစ်ခုလို့ ပြောလို့ရတယ် သမီး။ ဒါကြောင့် မေမေဟာ အသွားအလာ အနေအထိုင် အစားအသောက်ကို တတ်နိုင်သလောက် ဆင်ခြင်ခဲ့တာပေါ့။ ဘာလို့လည်းဆိုတော့ ကလေး တစ်ခုခုဖြစ်သွားရင် ဆိုတဲ့ အတွေးတွေက မေမေ့ကို တုန်လှုပ်ခြောက်ခြားစေတယ်လေ။ မေမေတင်မဟုတ်ပါဘူး သမီးရဲ့ အန်းကုန်း၊ အန်းမကလည်း သူတို့ရဲ့ တစ်ဦးတည်းသော မြေးအတွက် အဝေးကနေ စိတ်ပူနေတယ်ဆိုတာ မေမေခံစားလို့ရတယ်။ ဗုဒ္ဓဘာသာအရ ဆိုရင်တော့ ကလေးတစ်ယောက် လူဖြစ်လာဖို့ဆိုတာ ကလေးရဲ့ကံနဲ့ မေမေတို့ရဲ့ကံနဲ့လည်း ဆိုင်ပါတယ်။ ဒါပေမယ့်လည်း ကိုယ့်ရဲ့မဆင်မခြင် ပေါ့ဆမှုကြောင့် ကိုယ့်ရင်သွေးလေး ဆုံးရှုံးသွားရင် မေမေ တသက်လုံး ဖြေနိုင်မယ် မထင်ဘူး။ နောင်တတွေနဲ့ ပူဆွေးနေရတာမျိုးလည်း မဖြစ်ချင်ဘူး။ ဒါကြောင့် မေမေ လုပ်နိုင်သလောက် တတ်နိုင်သလောက် ကိုယ့်ကိုကိုယ်ရော ကလေးကိုရော ဂရုစိုက်ပြီး အနေအထိုင် အစားအသောက် ဆင်ခြင်ခဲ့တာပေါ့။ အဲဒီကြားထဲကမှ တခုခုဖြစ်သွားတော့လည်း ကံအတိုင်းပဲဆိုပြီး စိတ်ဖြေရမှာပေါ့။ ကိုယ်ဝန်က စိတ်ချရတဲ့အဆင့်ရောက်ပြီ၊ စိုးရိမ်စရာ မလိုတော့ဘူးဆိုတာကို လူကြီးတွေကို ပြောပြလိုက်တော့ သူတို့လည်း စိတ်အေးသွားရတော့တာပေါ့။


စက်တင်ဘာ ၁၃၊ ၂၀၁၀

August 31, 2010

သမီးဖတ်ဖို့ (၂၀၀၉ ခုနှစ် မေ- ဇွန်လ)

မိဘ ညီအကို မောင်နှမ အသိုင်းအ၀ိုင်း နဲ့ဝေးပြီး ကိုယ်ဝန်ဆောင်ရလိမ့်မယ်လို့ မေမေ တစ်ခါမှ တွေးမထားခဲ့မိဘူး။ တွေးမထားတာတွေက တကယ်ဖြစ်လာတော့လည်း ရှောင်လွှဲလို့ မရဘူးလေ။ “ဖြစ်ပါ့ မလား” ဆိုတဲ့ စိတ် ထက် “ဖြစ်အောင် လုပ်မယ်” ဆိုတဲ့ စိတ် ထားတတ်အောင် ကြိုးစားခဲ့ရတယ်။ ဒီကြားထဲမှာမှ ဗိုက်ထဲက ကလေး တစ်ခုခုဖြစ်သွားမှာလည်း ပူပင်ရသလို ကလေးကို ကောင်းကောင်း မပြုစုနိုင်မှာလည်း ကြောင့်ကြနေခဲ့ရတယ်။ အဲဒီလို အတွေးတွေနဲ့ လူက အလိုလို နေရင်း အားငယ်နေတတ်ပြန်တယ်။ ဒါတွေဟာ ဆေးပညာ အယူအဆအရ ဆိုရင်တော့ Hormone အပြောင်းအလဲကြောင့် ဖြစ်တာပါ လို့ ပြောလို့ရပေမယ့် ကလေးနဲ့ပတ်သက်တဲ့ ပူပင်ကြောင့်ကြစိတ်တွေဟာ သူ့အလိုလိုကို ဖြစ်နေတာ။ မိခင်တိုင်း ကိုယ်ဝန်ဆောင်ခါစမှာ ဒီလို ခံစားချက်မျိုးတွေ ရှိတယ်လုိ့ မေမေ စာအုပ်ထဲ ဖတ်ဖူးတယ်။ သားဦး ကလေးဆိုတော့ မိခင်က အတွေ့အကြုံမရှိသေးတာလည်း ပါတာပေါ့။ ခုခေတ်မှာတော့ မေမေ့လိုပဲ မြန်မာပြည်ရဲ့ မိဘအသိုင်းအ၀ိုင်းနဲ့ ဝေးပြီး ကိုယ်ဝန်ဆောင်၊ ကလေးမွေးတဲ့သူတွေ နိုင်ငံအရပ်ရပ်မှာရှိကြမှာပါ။ ကိုယ်တစ်ယောက်တည်း ဖြစ်နေတာမဟုတ်တော့လည်း အားငယ်တယ်၊ ၀မ်းနည်းတယ်ဆိုတာတွေကို တတ်နိုင်သလောက် ဖျောက်ထားပြီး ကိုယ့်စိတ်ကို တင်းထားခဲ့ရတယ်။ အဓိကတော့ စိတ်ဓာတ်ပျော့ညံ့မနေပဲ ကိုယ့်ရင်သွေးအတွက် အရာရာကို ရင်ဆိုင်မယ် ဆိုတဲ့ စိတ်က အရေးကြီးဆုံးပါပဲ။

*****

မေလ ၁၈ ရက်နေ့မှာ ရုံးပြန်တက်ပြီး သိပ်မကြာခင်ပဲ အလုပ်ထဲက အထက်လူကြီးတွေကို ကိုယ်ဝန်ရှိကြောင်း ဖွင့်ပြောလိုက်တော့တယ်။ နောက် blog ရေးရင်း ခင်တဲ့ သူငယ်ချင်းတစ်ချို့ရယ်၊ မေမေ့အရင် အလုပ်ထဲက သူငယ်ချင်းတချို့ရယ်ကို ပြောပြဖြစ်ခဲ့တယ်။ အဲဒီ သူငယ်ချင်းတွေက မေမေ့ဆီကို စာရေးပြီး ကိုယ်ဝန်စရှိတဲ့အချိန်မှာ ဂရုစိုက်ရမယ့် အချက်တွေကို အသေးစိတ် တကူးတက ပြောပြပေးကြတယ်။ အဲဒီအတွက်လည်း မေမေ့မှာ အားတက်ခဲ့ရသလို သူတို့ကိုလည်း စိတ်ထဲကနေ အကြိမ်ကြိမ် ကျေးဇူး တင်နေမိတယ်။ ဘာလို့လည်းဆိုတော့ မေမေက ကိုယ့်မိဘတွေနဲ့ အတူနေပြီး ကိုယ်ဝန်ဆောင်နေရတာ မဟုတ်တဲ့အတွက် မသိသေးတာတွေက များလှတယ်။ ဒါကြောင့် သူငယ်ချင်းတွေ ပေးတဲ့ အကြံဥာဏ်တွေအပြင် တခြား သိသင့်တာတွေအတွက်လည်း စာများများ ဖတ်ရတာပေါ့။ ကိုယ်ဝန်ဆောင်သည်တွေ ဖတ်ရမယ့် စာအုပ်တွေကိုလည်း ရန်ကုန်ကနေ ၀ယ်လာခဲ့တော့ အဲဒီ စာအုပ်တွေ ဖတ်ဖြစ်ခဲ့တယ်။ နောက်ပြီး မေမေ့ရဲ့ မန်နေဂျာ ၂ ယောက်ကလည်း ကိုယ်ဝန်နဲ့ ပတ်သက်တဲ့ စာအုပ် တစ်ယောက် တစ်အုပ်ဆီ လက်ဆောင်ပေးကြတယ်။ တစ်အုပ်က ဂျပန်လိုဖြစ်ပြီး တစ်အုပ်ကတော့ အင်္ဂလိပ်လိုပါ။ ဂျပန်လို စာအုပ်ကိုတော့ အရုပ်နဲ့ စာလေးနည်းနည်းပါးပါးလောက်ပဲ ဖတ်နိုင်ပါတယ်။ အင်္ဂလိပ်လို စာအုပ်ကိုတော့ ပါပါးက မေမေ့ကို ဖတ်ပြတယ်လေ။

နောက် မေမေဟာ ကိုယ့်ရဲ့ အနေအထိုင်၊ အစားအသောက်၊ အပြုအမူတွေကို အရင်လို စိတ်ထင်တိုင်း လုပ်လို့မရတော့ဘူး။ စိတ်လွတ်ကိုယ်လွတ်ပြုမိရင်လည်း ပါပါးက ဘေးကနေ လှမ်းသတိပေးတာမျိုး လုပ်ပေးတာပေါ့။ ကိုယ်တိုင်က မိဘနေရာ ရောက်လာပြီဆိုမှ မိဘမေတ္တာကို ပိုပြီး သိနားလည်လာရတယ်။ ဗိုက်ထဲက ကလေးလေးဟာ ဖြူသလား မဲသလား၊ ယောင်္ကျားလေးလား မိန်းကလေးလား ဘာမှ မသိရသေးတဲ့ အချိန်ကတည်းက အစားရှောင်ရတာနဲ့ အနေအထိုင် အသွားအလာ ဆင်ခြင်ရတာနဲ့လေ။ နောက်ပြီး အချိန်ရရင် ရသလို ပရိတ်ကြီး ၁၁ သုတ်နဲ့ ပဌာန်းတရားတော်ကို ဖွင့်ထားပြီး စိတ်ထဲက လိုက်မှတ်ရင်း ကျန်းမာသန်စွမ်းပြီး ကိုယ်လက်အင်္ဂါစုံလင်တဲ့ ကလေးလေးဖြစ်ဖို့ မေတ္တာပို့ပြီး ဆုတောင်းနေရတာလည်း အမောပါပဲ။

*****

ဆေးရုံပြဖို့ အတွက်တော့ မေမေတို့ ရုံးက HR ၀န်ထမ်းတွေဆီမှာ အကူအညီတောင်းခဲ့ရတယ်။ အဓိက အင်္ဂလိပ်လို ပြောတတ်တဲ့ ဆရာဝန်ရှိမယ့် ဆေးရုံကို ရှာခိုင်းရတာပါ။ သူတို့ရှာပေးတဲ့ ဆေးရုံထဲကမှ ပါပါးက အိမ်နဲ့ နီးတဲ့ Kitano Hospital (北野 病院) ကို ရွေးလိုက်တယ်။ ဆေးရုံ စ ပြတော့ မေလ ၃၀ ရက်နေ့ဖြစ်နေပြီ။ ဒါပေမယ့် အဲဒီနေ့က အင်္ဂလိပ်စကားပြောတတ်တဲ့ ဆရာဝန် ထိုင်တဲ့ရက် မဟုတ်တာနဲ့ သူနာပြု ဆရာမနဲ့ပဲ တွေ့ခဲ့ရတယ်။ ဆရာမလေးကတော့ မေမေတို့ကို ပြောပါတယ် “အခုပြမယ့် OG ဆရာဝန်က အရမ်းသဘောကောင်းပြီး အင်္ဂလိပ်စကားအပြင် တခြားဘာသာစကား ၉ မျိုးလောက်တတ်တယ်” တဲ့။ မေမေတို့ကတော့ ဆရာက မြန်မာစကား ပြောတတ်လိမ့်မယ် မထင်ထားမိဘူး။ ဒါနဲ့ ဇွန်လ ၁ ရက်နေ့ မှာမှ ဆရာနဲ့စ ပြရတယ်။ မေမေလည်း ဂျပန်ရောက်ကတည်းက ဆေးရုံဆိုတာ တစ်ခါမှ မပြဖူးတော့ အဆင်မှ ပြေပါ့မလားလို့ စိုးရိမ်စိတ် ဖြစ်မိတာပေါ့။ တကယ်တမ်း ဆရာဝန်နဲ့ တွေ့ဖို့ အခန်းထဲ ၀င်လိုက်တာနဲ့ မေမေတို့ကို “ မင်္ဂလာပါ” လို့ ဆရာက နှုတ်ဆက်တယ်။ နောက် ultra sound screen မှာ ပေါ်တဲ့ ကလေးရဲ့ အနေအထားနဲ့ ကိုယ်လက်အင်္ဂါလေးတွေကိုလည်း မြန်မာလိုပဲ ဖြေးဖြေးချင်း ရှင်းပြပေးတယ်။ ဆရာရဲ့ မြန်မာစကားက ၀ါကျ တိုတိုလေးတွေပေမယ့် နားလည်အောင် ပြောတာမို့ ဆေးရုံမှာ အဆင်ပြေခဲ့ပါတယ်။

ဆေးရုံစပြတဲ့ နေ့မှာ ultra sound ရိုက်တော့ ကလေးက နှလုံးခုန်နေပြီ၊ ခေါင်းနေရာလေးလည်း မြင်ရတယ်လို့ ဆရာဝန်ကတော့ ပြောပြတာပါပဲ။ မေမေ့မျက်စေ့ထဲတော့ ကလေးက လှုပ်စိ လှုပ်စိလေးပဲ ။ အဲဒီတုန်းက ကိုယ်ဝန် ၈ ပတ်ရှိနေတဲ့ သမီးလေးဟာ အရပ်က ၁၅ မီလီမီတာ ပဲရှိသေးတာ။ monitor screen မှာ ကြည့်လိုက်ရင် သေးသေးရှည်ရှည်လေးပဲပေါ့။ ဆရာဝန်ကတော့ မေမေ့ကို နောက်နှစ် ဇန်န၀ါရီလ ၁၀ ရက် မှာ မွေးမယ် ဆိုပြီး Due Date ပေးလိုက်တယ်။ နောက် ၂ ပတ် (ဇွန် ၁၅) နေရင် တစ်ခါ ထပ်လာပြဖို့ တလက်စတည်း ရက်ချိန်းပေးခဲ့ရတယ်။ နောက်ပြီး မေမေတို့ အခုနေတဲ့ ရပ်ကွက်ရုံးမှာ မိခင်နဲ့ ကလေးမှတ်တမ်း စာအုပ်ရယ်၊ ကိုယ်ဝန်ဆောင်သည်တွေအတွက် ဆေးကုသစရိတ်ကို မျှခံပေးတဲ့ discount coupon စာအုပ်ရယ် သွားထုတ်ဖို့ နဲ့ နောက်တစ်ခါ ရက်ချိန်းမှာ အဲဒီစာအုပ်တွေပါ ယူလာခဲ့ဖို့ သူနာပြုဆရာမလေးက မေမေ့ကို ပြောလိုက်တယ်။


သြဂုတ် ၃၁၊ ၂၀၁၀။

July 17, 2010

၆ လအရွယ် ချစ်စဖွယ်

ဒီနေ့ ဇူလိုင် ၁၇ ရက်နေ့ဆို သမီးက ၆ လပြည့်ပြီပေါ့။ ၆ လပြည့်ပြီဆိုတော့ သမီးလေးကို မိခင်နို့အပြင် ဖြည့်စွက်အစာကိုပါ ကျွေးရတော့မယ်။ အမှန်တော့ သမီးလေးက ၄ လကျော်လောက်ကတည်းက စားချင် သောက်ချင်တဲ့စိတ်တွေ ဖြစ်နေပြီလေ။ ပါပါးက သမီးကို ပေါင်ပေါ်တင်ထားပြီး ထမင်းစားရင်လည်း ပါပါး လက်ထဲက ထမင်းပန်းကန်ကို လှမ်းဆွဲတယ်။ လူကြီးတွေ တစ်ခုခု စားလို့ ပါးစပ်လှုပ်နေတာကို သေသေချာချာ လိုက်ကြည့်ပြီး နှုတ်ခမ်းတွေ သိမ်းပြရင်း စားချင်နေကြောင်းပြလာတယ်။ အဲဒါတွေ ကြည့်ပြီး မေမေက စိတ်မကောင်းလို့ သမီးလေးကို ဖြည့်စွက်အစာ စောစော ကျွေးချင်ပေမယ့် ဆေးရုံက ဆရာမတွေက မကျွေးဖို့ တားကြတယ်။ ဖြည့်စွက်အစာ စောပြီး ကျွေးမိရင် ကလေး ဗိုက်မကောင်းပဲ ၀မ်းသွားမှာစိုးလို့တဲ့။ နောက်ကျပြီး ကျွေးတာ ဘာမှ မဖြစ်နိုင်ဘူး စောင့်ပါဦးလို့ တားနေတာနဲ့ပဲ မေမေတို့လည်း ၆ လပြည့်မှ ကျွေးဖို့ ဆုံးဖြတ်လိုက်ရတယ်။ ဒါကြောင့် မနက်ဖန်ဆိုရင် သမီးလေး ဆံပြုတ်အရည် စ သောက်ရတော့မယ်နော်။

၃ လကျော်လာတဲ့ နောက်ပိုင်း သမီးရဲ့ ရုပ်ပိုင်းဆိုင်ရာ၊ စိတ်ပိုင်းဆိုင်ရာနဲ့ အသိဥာဏ် ဖွံ့ဖြိုး တိုးတက်မှုက မေမေတို့ကို အံ့သြစေတယ်။ ၆ လပြည့်ပြီဆိုတော့ သမီးရဲ့ မျက်နှာလေးက အစ ပြောင်းလဲလာတယ်။ အဲဒါကို ပါပါးက အရင် သတိထားမိပြီး “သမီးလေး ရုပ်က အရင်ကလို မဟုတ်တော့ဘူး” လို့ မေမေ့ကို ပြောပြတယ်။ ပါပါးပြောတော့မှ မေမေလည်း သမီး ဓာတ်ပုံတွေကို ပြန်ကြည့်မိတော့တယ်။ သမီးလေး မွေးခါစ ဓာတ်ပုံတွေနဲ့ အခုလက်ရှိ ရိုက်ထားတဲ့ပုံတွေ ယှဉ်ကြည့်လိုက်ရင် သမီးမျက်နှာလေးက သိသိသာသာကို ပြောင်းလဲလာတာပဲ။

၃ လကျော် (မေလ ၇ ရက်) မှာ ဆေးစစ်ရင်း ပေါင်ချိန်ကြည့်တော့ ကိုယ်အလေးချိန် (၅.၈) ကီလိုနဲ့ အရပ်က (၆၂.၂) စင်တီမီတာ ရှိတယ်။ ဇူလိုင် ၁၂ ရက်နေ့က တစ်ခါ ပေါင်ထပ်ချိန်ကြည့်တော့ (၆.၇) ကီလို နဲ့ အရပ်က (၆၇) စင်တီမီတာ ဖြစ်လာတယ်။ တခြားကလေးတွေနဲ့ယှဉ်ရင် သမီးလေး သေးနေတယ်လို့ မေမေ့ စိတ်မှာ ထင်နေမိတယ်။ ဒါကြောင့် စိုးရိမ်ပြီး “ကလေးက ကိုယ်အလေးချိန် သိပ်မတက်ဘူး၊ သေးနေလား မသိဘူးနော်” လို့ ဆရာမတွေကို ပြောပြမိတယ်။ အဲဒီတော့ ဆရာမတွေက လ အလိုက် သမီးရဲ့ ကိုယ်အလေးချိန်တွေကို graph ဆွဲထားတဲ့ စာရွက် မေမေ့ကို ပြတယ်လေ။ သမီးရဲ့ graph line က သတ်မှတ်ထားတဲ့ ဘောင်အတွင်း ရှိနေတာမို့ လုံးဝ စိုးရိမ်စရာမရှိဘူး လို့ မေမေ့ကို ပြောတယ်။ ဆရာမတွေနည်းတူ မေမေတို့လည်း သမီးကြီးထွားနှုန်းကို graph ဆွဲထားတာပါပဲ။ သမီးပါပါးကတော့ မိန်းကလေးနဲ့ ယောင်္ကျားလေး ကြီးထွားနှုန်း မတူတာမို့ တခြားကလေးတွေ တအားထွားတာကို ကြည့်ပြီး စိတ်မပူဖို့ မေမေ့ကို အားပေးပါတယ်။

အရင်ကထက်စာရင် သမီးရဲ့ ခြေလက်တွေက ပိုပြီးသန်မာ လာသလို လှုပ်ရှားပြီးလည်း ကစားတတ်လာတယ်။ တွဲလောင်းကျတဲ့ အရုပ်တွေကို အိပ်ရင်း လက် နဲ့ လှမ်းထိတယ်။ လှမ်းဆွဲပြီးလည်း ဆော့တယ်။ အရုပ်တွေကို လက်နဲ့ဆော့ရတာ အားမရရင်တော့ ခြေထောက်နဲ့ ကန်ပြီး အကြိုက်ဆော့တော့တာပဲ။ မေမေတို့က သမီးလေး သွားယားရင် ကိုက်လို့ရအောင် ဆိုပြီး ၀ယ်ပေးထားတဲ့ အရုပ်ကိုလည်း လက်နဲ့ ကိုင်ပြီး အားရှိပါးရှိ ကိုက်ဆော့နေတတ်တယ်။ သမီးကို ထိုင်ခုံလေးထဲ ထည့်ထားရင်လည်း ထိုင်နေရာက အားယူပြီး ကုန်းထ တတ်သလို ဆိုဖာပေါ်တင်ထားပြန်တော့လည်း ကုန်းထလို့ တစ်ခါ ပြုတ်ကျပြီးပြီလေ။ အဲဒါတွေတင် မကသေးဘူး။ ရေဇလုံနဲ့ ရေ ချိုးပေးရင်လည်း ရေဇလုံကို ကိုင်ပြီး ကုန်းထတယ်။ ရေချိုးတိုင်း တစ်မျိုးမဟုတ် တမျိုး ဆော့ပြီး ထိန်းမနိုင်တော့လို့ သမီးကို ရေဇလုံနဲ့ မချိုးပေးတော့ပဲ ရေချိုးခန်းမှာ သွားချိုးပေးရတော့တယ်။

တခါတလေများဆို ပစ္စည်းတစ်ခုခုကို ဆတ်ကနဲ လှမ်းဆွဲလိုက်တာပဲ။ အဲဒီလို လှမ်းဆွဲဖို့ သမီး မျက်စေ့ အကျဆုံးကတော့ မေမေ့ဆံပင်တွေပဲပေါ့။ လူကြီးတွေရဲ့ မျက်နှာကို စိတ်ဝင်တစားကြည့်ပြီး စိတ်မထင်ရင် ဖြတ်ကနဲ ကုတ်ဆွဲတတ်သေးတယ်။ ကလေး အားဆိုပေမယ့် သမီးက သန်ကလည်း သန်၊ လက်သည်းလည်း မညှပ်ထားရသေးရင် ကုတ်ဆွဲ ခံရတဲ့ သူက မသက်သာလှဘူး။ သူများကိုတင် မဟုတ်ဘူး သမီး မျက်နှာမှာလည်း ကိုယ်ဘာသာ ကုတ်ခြစ်ထားတဲ့ လက်သည်းရာတွေလည်း ရှိတာပဲလေ။ အဲဒီလိုမျိုးတွေ မြင်ရတော့ ပါပါးက သမီး မိန်းကလေး မပီသပဲ အရမ်းကြမ်းတမ်းမှာကို စိုးရိမ်နေလေရဲ့။

လက်လှုပ်ရှားမှုတင်မကဘူး လက်ချောင်းလေးတွေရဲ့ လှုပ်ရှားမှုကလည်း တိုးတက်လာတယ်။ လက်ချောင်းလေးတွေကို ဆုပ်လိုက် ဖြန့်လိုက်လုပ်တတ်တယ်။ သီချင်းသံ ခပ်မြူးမြူးများကြားရင် လက်ကောက်ဝတ်လေးကို လှည့်ပြီး ကစားတော့တာပဲ။ ဒါတင်မကဘူး ယားတဲ့နေရာကိုလည်း လက်ကလေးနဲ့ ကိုယ့်ဘာသာကိုယ် ကုတ်တတ်နေပြီလေ။ နို့စို့ချိန်ဆိုလည်း သမီးရဲ့ လက်ချောင်းလေးတွေနဲ့ မေမေ့မျက်နှာကို တို့လိုက် ထိလိုက်နဲ့ ဆော့ကစားတတ်တယ်။ မေမေက သမီးလက်ချောင်းလေးတွေကို ကိုက်သလိုလို မထိတထိ လုပ်ပြရင်တော့ သဘောကျမဆုံးဘူး။

*****

သမီးလေးက လူကသာ ၆ လရှိတာ၊ အသစ်အဆန်းမှန်သမျှ၊ လူကြီးတွေ လုပ်တာမှန်သမျှ စိတ်ဝင်တစားလိုက်ကြည့်ပြီး သိပ်စပ်စုတာပဲ။ မေမေ ဖုန်းကိုင်ရင် သမီးလည်း ဖုန်းလိုက်ကိုင်ချင်တယ်။ ဖုန်းပြောနေရင် လက်ထဲက ဖုန်းကို အတင်း လှမ်းဆွဲတယ်။ မေမေက ကွန်ပျူတာ သုံးရင် သမီးလည်း ကွန်ပျူတာ ခလုတ်တွေကို နှိပ်ကြည့်ပြီး သုံးချင်တယ်။ ဘာလုပ်မလဲဆိုပြီး လွှတ်ပေးထားလိုက်ရင် ကွန်ပျူတာ ကီးဘုတ်ကို လက်သေးသေးလေးနဲ့ တဖုန်းဖုန်းမြည်အောင် ရိုက်ပြီး ဆော့တော့တာပဲ။ လူကြီးတွေက Remote Control ခလုပ်ကို နှိပ်ရင် သမီးလည်း နှိပ်ကြည့်ချင်လို့ အတင်း လိုက်လုတယ်။ တခါတလေလည်း သမီးနေရင် ပြီးရောဆိုပြီး Remote Control ကို ချထားပေးလိုက်ရတော့တယ်။ အဲဒီလိုဆိုရင် သမီးက အရင်ဆုံး Remote Control က ခလုပ်တွေကို ကုတ်ဖဲ့ပြီး နှိပ်ကြည့်တယ်။ နှိပ်ရင်းနဲ့ အားမရတော့ရင် ကုန်းပြီး ကိုက်တော့တာပဲ။ သမီးက နည်းနည်းကြီးလာလေ အဆော့မက်လေပဲ။ ဆော့ရမယ်ဆို ပါပါးနဲ့ မေမေသာ မောသွားမယ်၊ သမီးက ဘယ်တော့မှ မမောဘူး။

ဒီအရွယ်လေးနဲ့ လူကြီး အရိပ်အကဲကိုလည်း ကောင်းကောင်းသိတယ်။ လူကြီးတွေက သမီးကို ဆူတာလား၊ ချီးကျူးနေတာလား၊ စ နေတာလား ဆိုတာ ကောင်းကောင်းခွဲခြားနိုင်တယ်။ ပါပါးက အိပ်ပျော်နေလို့ ဟောက်သံကြားရင် မရီပေမယ့် မေမေက “သမီးရေ မေမေအိပ်ပြီနော်” လို့ ပြောပြီး ဟောက်ပြရင်တော့ နောက်ပြောမှန်းသိပြီး ခိုးခိုးခစ်ခစ် နဲ့ သဘောကျမဆုံးဘူး။ လူကြီးတွေ ပါးစပ်က အသံတခုခု ထွက်ရင်လည်း အရမ်းသဘောကျတတ်တယ်။ လူကြီးတွေရဲ့ လေချဉ် တက်သံကြားလည်း သဘာကျပြီး ရီ။ နှာချေလည်း ရီ၊ ချောင်းဆိုးလည်း ရီ၊ ပါးစပ်က အသံတခုခု ထွက်လိုက်ရင်ကို သမီးက ရီတော့တာပဲ။ နောက် မကျေနပ်တာရှိရင်လည်း ပါးစပ်က ဘူးမှုတ်လာတယ်။ ဒါအပြင်ကို လက်ကားယားနဲ့ ခြေထောက်နှစ်ချောင်းကို ပွတ်ပြီး မကျေနပ်ကြောင်း လူကြီးတွေ သိအောင် ပြတော့တာပဲ။ သမီးက ငယ်ငယ်လေးနဲ့ တီဗွီကြည့်တတ်သလို သီချင်းလည်း ကြိုက်မှကြိုက်ပဲ။ ညအိပ်တော့မယ်ဆိုရင် သမီးကို သီချင်းနဲ့ချော့သိပ်မှပဲ အိပ်တော့တယ်။

*****

တချို့ကလေးတွေကတော့ ၃ လကျော်ရင် စပြီး မှောက်တတ်တယ်လို့ ပြောကြတယ်။ တချို့လည်း ၄ လကျော်မှတဲ့။ ဒါပေမယ့် မိခင်နဲ့ ကလေး မှတ်တမ်းစာအုပ်မှာရေးထားတော့ ၅ လ ကနေ ၆ လ အတွင်းဆို မှောက်ကို မှောက်ရမယ်လို့ ရေးထားတယ်။ သမီးက ၅ လကျော်လာတဲ့အထိ မမှောက်တတ်သေးတော့ ဘယ်လို လုပ်ရင် ကောင်းမလဲဆိုပြီး မေမေတို့ စိတ်ပူမိတယ်။ သမီးက မှောက်ဖို့ထက် ထိုင်ဖို့ နဲ့ မတ်တပ်ရပ်ရတာကို ပိုပြီး အားသန်တယ်။ ၅ လကျော်လာတဲ့နောက်ပိုင်း မှောက်တတ်သွားအောင်ဆိုပြီး သမီးကို မွေ့ယာပေါ်မှာပဲ တမင်ထား ထားလိုက်တော့တယ်။ အဲဒီနောက် မေမေက သမီးရဲ့ ခြေထောက်နဲ့ ခါးကို နည်းနည်းလေး ထိန်းပေးပြီး ကိုယ်လေးကို လှဲ့ပေးလိုက်ရင်တော့ သမီးက အလိုက်သင့်မှောက်တတ်လာတယ်။ အဲဒီလိုမျိုး ၁ ရက် ၂ ရက်လောက် လေ့ကျင့်ပေးလိုက်ရတယ် ၊နောက်ရက်တွေကျတော့ သမီးက ကိုယ့်ဘာသာကိုယ် မှောက်တတ်နေပြီ။ သမီးက မှောက်တာ နောက်ကျလို့ပဲလား မသိဘူး၊ မှောက်တတ်ပြီး သိပ်မကြာဘူး တစ်ရက် နှစ်ရက်အတွင်း ပက်လက် ပြန်လှဲချတတ်တယ်။ အဲဒီတော့မှပဲ မေမေတို့လည်း စိတ်အေးရတော့တာပေါ့။

နောက်ပိုင်း အိပ်ယာက နိုးပြီဆို သမီးက မှောက်လိုက်၊ ညောင်းလာရင်လည်း ပက်လက် ပြန်လှဲချလိုက်နဲ့ အဆင်ကိုပြေနေတာပဲ။ တခါတလေလည်း စောင်ဖြစ်ြဖစ် ခေါင်းအုံးဖြစ်ဖြစ် ခံနေရင် တော်တော်နဲ့ မှောက်မရပြန်ဘူး။ အဲဒီအခါဆိုရင် သမီးလေး ဘာလုပ်မလဲဆိုပြီး မေမေက ကူမပေးပဲ အသာ စောင့်ကြည့်နေလိုက်တယ်။ သမီးက ကိုယ်ကြီးကို စောင်းပြီး အကြိမ်ကြိမ် ကြိုးစား မှောက်ကြည့်တယ်။ မှောက်မရပဲ ကြာတော့ မောလာရင် ပက်လက်လှန်ပြီး ခဏ အနားယူလိုက်သေးတယ်။ အဲဒီအချိန်ကျရင် မေမေက မသိမသာ စောင်တုိ့ ခေါင်းအုံးတို့ကို ဖယ်ပေးထားလိုက်ရတာပေါ့။ သမီးက အမောပြေသွားရင် နောက်တစ်ခါ ကြိုးစားပြီး မှောက်ပြန်ရော။ မှောက်လို့ရသွားရင်တော့ မေမေ့ဘက်လှည့်ကြည့်ပြီး ပြုံးပြတော့တာပဲ။ သမီး လုပ်နိုင်တယ် ဆိုတာလေးကို လူကြီးတွေကို သိစေချင်တာလေ။ လူကြီးတွေက လက်ခုပ်တီးပေးပြီး “တော်တယ်ကွာ” လို့ ချီးကျူးရင်တော့ သဘောတွေကျပြီး သွားဖုံးလေးပေါ်အောင် ရီပြတော့တာပဲ။

သမီးလေးဟာ အခု အရွယ်ကစပြီး လိုချင်တာ၊ ဖြစ်ချင်တာကို မရ ရအောင် လုပ်မယ်ဆိုတဲ့ စိတ်လေးကို ပါပါးနဲ့ မေမေ သတိထားမိလာတယ်။ ဥပမာ သမီးက လှဲထားတာ မကြိုက်တော့ လူကြီးတွေကို လာခေါ်စေချင်တယ်၊ မေမေတို့ကလည်း လက်မအားလို့ မခေါ်နိုင်ဘူးဆို မခေါ်မချင်း အော်ငိုနေတော့တာပဲ။ မေမေနဲ့ ပါပါး သမီးကို မချီပဲ ၁၀ မိနစ်ကျော်ကျော်လောက် ဒီအတိုင်း ထားဖူးတယ်။ သမီးက လုံးဝ ဇွဲလည်း မလျော့ဘူး၊ ငိုတဲ့အသံလည်း မလျော့ဘူး။ အငိုလည်း မရပ်ဘူး။ နောက်ဆုံး တကိုယ်လုံး ချွေးတွေ ရွှဲလာလို့ လူကြီးတွေက အလျော့ပေးပြီး ကောက်ချီလိုက်ရတယ်။ အဲဒါကို ကြည့်ပြီး ပါပါးနဲ့မေမေက သမီးက ဇွဲကောင်းတယ် တခုခုဆို မဖြစ်ဖြစ်အောင် လုပ်မယ်ဆိုတဲ့ စိတ်ရှိတယ်ဆိုပြီး နှစ်ယောက်သားပြောဖြစ်ကြတယ်။ အဲဒီလို စိတ်လေးကို ကောင်းတဲ့ဘက်မှာ ဇွဲရှိအောင် လူကြီးတွေက တည့်မတ်ပြီး လမ်းညွှန်ပေးရမှာပေါ့ သမီးရယ်။

၃ လ ကနေ ၆ လအထိ သမီးရဲ့ တိုးတက်မှုတွေကို ချရေးမယ်ဆို ရေးစရာတွေ အများကြီးပါပဲ။ ဒီနေ့ ဟာ သမီးလေး ၆ လပြည့်တဲ့ အတွက် သမီးရဲ့ တိုးတက်မှုတွေကို အမှတ်တရ အနေနဲ့ ပို့စ်အဖြစ် ရေးထားလိုက်တာပါ။ မေမေ့ သမီးလေးဟာ ဂျီကျပြီး ငိုတဲ့အချိန်ကလွဲရင် တကယ်ကို ချစ်စဖွယ်လေးမို့ မေမေက ဒီပို့စ်ရဲ့ ခေါင်းစဉ်ကို “၆ လအရွယ် ချစ်စဖွယ်” လို့ ပေးလိုက်မယ်နော်။

ဇူလိုင် ၁၇၊ ၂၀၁၀

July 9, 2010

အသွင်တူ၏ မတူ၏



Photo: Link

မမသက်ဝေရဲ့ အသွင်တူ၏ မတူ၏ ပို့စ်ကို ဖတ်ပြီး ကျမတို့ နှစ်ယောက်ရော တစ်ယောက်နဲ့ တစ်ယောက် အသွင်တူလို့ အိမ်သူဖြစ်ကြတာလား၊ ဘယ်အချက်တွေကတော့ တူပြီး ဘယ်အချက်တွေ မတူဘူးလဲဆိုတာ တွေးဖို့ သတိရသွားတယ်။ ကျမတို့ နှစ်ယောက်အကြောင်းကို "ဘ၀လက်တွဲဖော်" ပို့စ်မှာလည်း ရေးခဲ့ဘူးပါတယ်။

လက်မထပ်ခင် ချစ်သူ ရည်းစား ဘ၀မှာတုန်းကတော့ တစ်ယောက်နဲ့ တစ်ယောက် အသွင် တူတာ မတူတာ သိပ်ပြီး အဓိက မကျလှဘူးလို့ ထင်မိတယ်။ အချစ်ဝင်နေတဲ့အချိန်ဆိုတော့လည်း အပြစ်မမြင်ဘဲ ဒါတွေက ဘာမှ မဟုတ်သလိုလိုပေ့ါလေ။ အဲဒီတော့ အသွင်တူလား မတူလားဆိုတာ မစဉ်းစားခဲ့မိဘူး။ ပြောကြမယ်ဆိုရင် ကိုယ့်ရဲ့ မိသားစု မောင်နှမသားချင်းထဲမှာတောင် တစ်ယောက်နဲ့ တစ်ယောက် အကျင့်စရိုက်၊ စိတ်နေစိတ်ထား ထပ်တူကျတယ်ဆိုတာ ရှားပါတယ်။ ဒါကြောင့် မိသားစု နှစ်စုကနေ ပေါက်ဖွားလာပြီး အိမ်ထောင်ဖက်အဖြစ် ရောက်လာကြတဲ့ စုံတွဲတွေမှာ တူတာတွေလည်း ရှိနိုင်သလို မတူတာတွေလည်း ရှိနိုင်တာပဲ။ နောက်ပြီး အတူနေတာ ကြာလာတာနဲ့ အမျှ တစ်ယောက် သဘော တစ်ယောက် လိုက်ရင်း တူသွားတတ်တာလေးတွေလည်း ရှိကြမှာပဲ။

ကျမတို့ နှစ်ယောက်စလုံး လူလတ်တန်းစား ပတ်ဝန်းကျင်မှာ ကြီးပြင်းခဲ့ရတာချင်းတူပါတယ်။ မိသားစုထဲမှာ အလတ်ဖြစ်ရတာချင်းလည်း တူကြတယ်။ အလတ်ဆိုတော့ မိဘတွေက မျက်နှာသာ မပေးတာ၊ အကြီးတွေ အငယ်တွေလို သည်းသည်းလှုပ် အချစ်မခံရတာချင်းလည်း တူတယ်။ သားသမီးတွေကို အလိုမလိုက်တတ်တဲ့ အမေနဲ့ နားဝင်အောင် ပြောပြီး ဆုံးမတတ်တဲ့အဖေတွေရှိတာချင်းလည်း တူကြတယ်။ နောက်ပြီး ကျမတို့ အဖေတွေက ဥာဏ်ကောင်းကြပေမယ့် ဘ၀ပေး အခြေအနေအရ အတန်းပညာ မတတ်ခဲ့ကြဘူး။ ဒါကြောင့် သူတို့ရဲ့ သားသမီးတွေ အားလုံးကို ပညာတတ်ဖြစ်စေချင်ကြတယ်။ ပညာတတ်တစ်ယောက်ရဲ့ တန်ဘိုးကို နားလည်အောင် ရှင်းပြတတ်သလို ကိုယ်တတ်ထားတဲ့ ပညာနဲ့ ကိုယ့်ခြေထောက်ပေါ် ကိုယ်ရပ်တည်နိုင်ဖို့ ၊ ကိုယ့်အား ကိုယ်ကိုးဖို့ နည်းပေးလမ်းညွှန်တွေ လုပ်ပေးခဲ့ကြတယ်။ နှစ်ဘက်မိဘတွေက အသက်ကြီးလာလို့ အလုပ် မလုပ်နိုင်ကြတော့တဲ့အခါ မိသားစုရဲ့ ကိစ္စ အ၀၀ကို အလတ်တွေဖြစ်တဲ့ ကျမတို့ နှစ်ယောက်ကပဲ တာဝန်ပိုယူကြရပါတယ်။ အဲဒီအတွက်လည်း နှစ်ယောက်စလုံး ဘယ်တော့မှ မငြိုငြင်ခဲ့ကြပါဘူး။

အလုပ်ထဲမှာတွေ့ပြီး လက်ထပ်ခဲ့ကြတာဆိုတော့ ကုမ္ပဏီတစ်ခုထဲမှာပဲ သူက ၇ နှစ်ကျော် ၈ နှစ်နီးပါးနဲ့ကျမက ၆ နှစ်ကျော် အလုပ်အတူ လုပ်ခဲ့ကြတယ်။ လုပ်ရတဲ့ အလုပ်ချင်းတော့ မတူပါဘူး။ အခု ဂျပန်ရောက်လာပြန်တော့လည်း အလုပ်တူ၊ နေရာတူ၊ department တစ်ခုထဲမှာပဲ လုပ်ရပြန်တယ်။ အလုပ်နဲ့ပတ်သက်ပြီး အကောင်းဆုံးဖြစ်အောင် လုပ်ပေးတတ်တဲ့ စိတ်ထားချင်းလည်း တူပါတယ်။ အလုပ်အတူတူပဲ ဆိုတော့ ရုံးအကြောင်း၊ အရင်အလုပ်က အကြောင်း၊ အလုပ်ခွင်က သူငယ်ချင်းတွေအကြောင်း၊ အခုလက်ရှိအလုပ်ထဲက လူတွေအကြောင်း ပြောမိပြီဆို တော်တော်နဲ့ စကားစ ဖြတ်မရဘူး။

သီချင်းကြိုက်ကြတာချင်း တူသလို အသံမကောင်းပေမယ့် သီချင်းဆိုချင်တဲ့ စိတ်ရှိတာချင်းလည်း တူကြတယ်။ သူများကို ကိုယ်တတ်နိုင်သလောက် ကူညီပေးချင်တာ၊ သူတစ်ပါးဆီက အကူအညီကို မလိုအပ်ပဲ ယူရမှာ အားနာတတ်တာ၊ ကိုယ့်ကြောင့် သူတစ်ပါးကို မထိခိုက်စေချင်တာ စတဲ့ စိတ်အခြေခံချင်းလည်း တူကြတယ်။

ဘယ်အရာမဆို စိတ်ရှင်းရှင်း ထားတတ်အောင်၊ သူများလုပ်လို့ လိုက်လုပ်ရတာမျိုးမဟုတ်ဘဲ ဘ၀ကို ကိုယ့်သဘောအတိုင်း ရပ်တည်တာမျိုးကျတော့ သူနဲ့ လက်ထပ်ပြီးမှ အဲဒီလို စိတ်ဓာတ်မျိုးတွေ ကျမ ထားတတ်သွားတာပါ။ စိတ်မရှည်တတ်တာ၊ အနားနီးမှ ကပ်လုပ်တတ်တဲ့ အကျင့်ကြတော့ ကျမဆီကနေ သူ့ဆီ ကူးသွားတယ် ထင်တာပါပဲ။

တူတာတွေချည်းပဲ ပြောနေလို့ မတူတာ မရှိဘူး ထင်နေဦးမယ်။ ယောင်္ကျားနဲ့ မိန်းမဆိုတဲ့ အခြေခံသဘာဝကြီးကမှ မတူတာဆိုတော့ ကျမတို့ နှစ်ယောက်မှာလည်း အများနည်းတူ မတူတဲ့ ကွဲလွဲချက်တွေကတော့ ရှိတာပဲ။ မတူတာတွေ ပြောရင်တော့ ပြောလို့ကုန်မယ် မထင်ဘူး။ အဲဒီတော့ တခါတလေ လျှာနဲ့သွား ကိုက်မိကြလေသတည်းပေါ့။ ကြာကြာလည်း စိတ်မကောက်တတ်ကြတော့ ခဏနေ ပြန်ပြီး စကားပြောဖြစ်သွားတာပါပဲ။ အားလုံးအဆင်ပြေနေတယ်ဆိုရင် နေရတာ ပျင်းစရာကြီးဖြစ်နေမှာ။

တစ်ယောက်နဲ့ တစ်ယောက် နှစ်သက်မြတ်နိုးလို့ လက်ထပ်ယူခဲ့တာဆိုတော့ အသွင်တူခြင်း မတူခြင်းထက် စိတ်သဘောထားခြင်း တိုက်ဆိုင်ဖို့၊ အချစ်ခြင်း ညီဖို့ နဲ့ မတူတာတွေ ရှိရင်တောင် နားလည်မှုရှိဖို့ ကျမတို့ ကြိုးစားနေရတုန်းပါပဲ။ ဒါကြောင့် မမသက်ဝေက ချစ်လို့ tag တဲ့ ပို့စ်ကို ကျမတို့ကလည်း အချစ်တွေနဲ့ ရေးပါတယ်လို့ ပြောရင် လွန်မယ် မထင်ပါဘူးနော်။

ဇူလိုင် ၉၊ ၂၀၁၀။

July 4, 2010

BCG Vaccine


Photo Link:

သမီးလေးမွေးပြီး ၃ လကျော်လာတဲ့အထိ ဆေးရုံမှာ Vitamin K2 syrup ကို ၃ ခါတိုက်တာက လွဲပြီး ကာကွယ်ဆေး မထိုးပေးပါဘူး။ Vitamin K2 ကို မွေးပြီး ၁ ရက်မှာ တစ်ခါ၊ ၅ ရက်မှာ တစ်ခါ နဲ့ ၁ လပြည့်လို့ ဆေးရုံမှာ ပြန်ပြရတုန်းက တစ်ခါ တိုက်ပေးပါတယ်။ ကလေး ၃ လကျော်လာတော့ အိမ်ကို ရပ်ကွက်ရုံးကနေ မေလ ၆ ရက်နေ့မှာ BCG ကာကွယ်ဆေး လာထိုးဖို့ အကြောင်းကြားစာ ရောက်လာခဲ့တယ်။

အဲဒီရက် ရောက်တော့ ရပ်ကွက်ရုံးကို ကာကွယ်ဆေးထိုးဖို့ သွားရတာပေါ့။ ရပ်ကွက်ရုံးရောက်တော့ ဖောင်အရင်ဖြည့်ပြီး မေးခွန်းတစ်ချို့ဖြေရပါတယ်။ အဓိကတော့ ၃ လအတွင်း ကလေး ဖျားနာခြင်း ရှိမရှိ၊ မိသားစုထဲမှာ တီဘီရောဂါ ရှိမရှိ၊ ကလေးက ရောဂါတစ်ခုခုကြောင့် ဆေးရုံ တက်ရခြင်း ရှိမရှိ၊ လက်ရှိဆေးသောက်နေတာမျိုး ရှိမရှိ၊ ကလေးနဲ့ မတည့်တဲ့ဆေးတွေ ရှိမရှိ စတဲ့ မေးခွန်းတွေ ဖြေရပါတယ်။ တခြား ကိုယ် မေးချင်တာ၊ သိချင်တာ ရှိရင်လည်း ဖောင်ထဲမှာ ထပ်ဖြည့်ရေးလို့ရပါတယ်။ ကျမကတော့ ဆေးထိုးပြီးရင် ဆေးရှိန်ကြောင့် ကလေး ဖျားနာမှာ စိုးရိမ်မိပါတယ်။ ဒါကြောင့် တကယ်လို့များ ဆေးထိုးပြီး ကလေးတခုခုဖြစ်ရင် ဘယ်လိုလုပ်ရမလဲဆိုတာ ဖောင်ထဲမှာ ဖြည့်ရေးလိုက်ပါတယ်။ ကာကွယ်ဆေးအတွက် ပိုက်ဆံပေးစရာ မလိုပါဘူး။

နောက်ပြီး ရပ်ကွက်ရုံး ဆရာမလေးကလည်း ဆေးမထိုးခင် သိသင့်တာတွေကို ရှင်းပြပေးပါသေးတယ်။ ဆေးထိုးပြီးတာနဲ့ ထိုးထားတဲ့နေရာကို လက်၊ အ၀တ်၊ ဆံပင် စတာတွေနဲ့မထိမိဖို့၊ ဆေးထိုးပြီး ၁၅ မိနစ်ကနေ နာရီဝက်အတွင်း အိမ်မပြန်သေးပဲ ရပ်ကွက်ရုံးမှာပဲ ခဏစောင့်နေဖို့၊ ၃ ရက်နဲ့ ၁၀ ရက်အတွင်း ဆေးထိုးထားတဲ့နေရာမှာ အနာဖုတွေထွက်လာရင် ရပ်ကွက်ရုံးကို အကြောင်းကြားဖို့၊ ဆေးထိုးပြီး ကလေးအဖျားတက်ရင်လည်း ရပ်ကွက်ရုံးကို အကြောင်းကြားဖို့၊ ဆေးထိုးပြီး ၃ ပတ်ကနေ ၅ ပတ်အတွင်း အနီဖုတွေ ပေါ်လာရင်တော့ မစိုးရိမ်ဖို့ စတာတွေကို ရှင်းပြပေးပါတယ်။


ဆေးထိုးပေးတဲ့ အပ်ပါ။ Photo Link:

ဆေးထိုးပေးမယ့် အခန်းထဲရောက်တော့ အရင်ဆုံး ကလေးရဲ့ ကိုယ်အပူချိန် တိုင်းယူပါတယ်။ ပြီးတော့ ဖောင်မှာဖြေထားတဲ့ မေးခွန်းတွေကို တစ်ခါ ထပ်ပြီး confirm လုပ်ပါတယ်။ ပြီးရင် ကလေးရဲ့ ဘယ်လက်မောင်းမှာ ဆေးထိုးမှာမို့ အင်္ကျီတို့ သွားရည်ခံတို့ကို ဘယ်လက်လေး ပေါ်အောင် ချွတ်ထားရပါတယ်။ ကလေးဆရာဝန်က အရင် စမ်းသပ် စစ်ဆေးပြီးမှ ဆေးထိုးပေးမယ့် ဆရာမတွေဆီ သွားရတာပါ။ ဆေးထိုးမယ့် နေရာရောက်တော့ သမီးလေးကို ပေါင်ပေါ်တင်ပြီး နောက်ဘက်ကနေ ပိုက်ထားရပါတယ်။ ဆရာမတွေနဲ့ဆို ကလေးက မျက်နှာချင်းဆိုင် အနေအထားပေါ့။ ထင်ထားတာက ကာကွယ်ဆေးကို ဆေးထိုးအပ်နဲ့ လက်မောင်းမှာ ထိုးပေးမယ် ထင်တာပါ။ တကယ်တမ်းဆေးထိုးတော့ သမီးလေး လက်မောင်းပေါ်ကို ဆေးစက် ချလိုက်ပြီးမှ ပင်အပ် ၉ ချောင်းပါတဲ့ တံဆိပ်တုံးနဲ့ အရှည်လိုက် ၂ ခါ ဖိချလိုက်တာပါ။ ဒီတော့ ကလေးရဲ့ လက်မောင်းမှာ အပ်ရာလေးတွေ ၁၈ ပေါက်ဖြစ်သွားတာပေါ့။

ဆေးထိုးပြီးသွားတော့ မိနစ် ၂၀ လောက် ဆေးခြောက်အောင် ခဏစောင့်ရပါတယ်။ ဆေးမခြောက်မချင်း ဆေးထိုးထားတဲ့နေရာကို ဆံပင်၊ အ၀တ်တို့နဲ့ မထိအောင်လည်း သတိထားရပါသေးတယ်။ သမီးလေးကတော့ ဆေးထိုးတုန်း နာလို့ အသံစူးစူးလေးနဲ့ ၂ ချက်လောက် အော်လိုက်ပြီး နောက်တော့ သူ့ဘာသာသူ တိတ်သွားပါတယ်။ တခြားကလေးတွေလည်း နာလို့ ငိုတဲ့သူလည်း ငို၊ မငိုတဲ့ကလေးတွေလည်း မငိုကြဘူး။ ဆေးခြောက်သွားတော့မှ ဆရာဝန်မလေးက အင်္ကျီပြန်ဝတ်ပြီး အိမ်ပြန်လို့ရပြီလို့ ပြောပါတယ်။


ဆေးထိုးပြီး ၂ ရက်။

ဆေးထိုးပြီးတော့ ကလေးများ တခုခုဖြစ်မလား ဆိုပြီး စိုးရိမ်ပေမယ့် သမီးလေးက ပုံမှန်အတိုင်းပဲမို့ စိတ်အေးရပါတယ်။ ဆေးထိုးပြီး ၁ ရက် ၂ ရက်အတွင်းတော့ အနာကို နည်းနည်း သတိထားပြီး ကြည့်ပေးဖြစ်တယ်။ ဆေးထိုးထားတဲ့ အနာ ရှိပေမယ့်လည်း ပုံမှန်အတိုင်း ရေချိုးပေးလို့ရပါတယ်။ အညှော်မိပြီး အနာဖြစ်မှာစိုးလို့ အဲဒီတလောကတော့ ဆီသတ်ပြီး ချက်ရတဲ့ ဟင်းမျိုး မချက်ဖြစ်ပါဘူး။ ၁၀ ရက်လောက်အထိ စောင့်ကြည့်ပြီး ပြည်တည်သလိုမျိုး အနာဖုတွေ ထွက်မလာတော့မှ စိတ်အေးရပါတယ်။


ဆေးထိုးပြီး ၃ ပတ်ကျော်။

ဆေးထိုးထားတာ ၃ ပတ်ကျော်လာတော့ ပင်အပ်ရာလေးတွေက ခြင်ကိုက်ဖုလေးတွေလို အဖုလေးတွေ ပေါ်လာတယ်။ ၅ ပတ်ကျော်လာတော့ အဖုလေးတွေက ကြွတက်လာပြီး ပြည်တည်ဖုလေးတွေလို ဖြစ်လာတယ်။ ဖြစ်ချင်တော့ အဲဒီအချိန်တုန်းကလည်း ကျမတို့က ရန်ကုန်ရောက်နေတာမို့ အညှော်တွေမိလို့ အနာက ပြည်တည်လာတယ်လို့ ထင်တာပါ။ အဲဒီလိုဖြစ်တာ ပုံမှန်ပဲဆိုတာ အင်တာနက်မှာ ရှာကြည့်တော့မှ သိရလို့ စိတ်အေးရပါတယ်။ အခုဆို ဆေးထိုးပြီးတာ ၂ လနီးပါးရှိလာပြီမို့ အနာတွေလည်း တဖြည်းဖြည်း ချပ်သလောက်တော့ ဖြစ်လာပါပြီ။ သိပ်မကြာခင်မှာပဲ အနာတွေ အရှင်းပျောက်သွားမယ်လို့ မျှော်လင့်ရတာပါပဲ။


ဆေးထိုးပြီး ၅ ပတ်ကျော်။


ဆေးထိုးပြီး ၂ လနီးပါး။

** ကျမရဲ့ သူငယ်ချင်းက Blog မရေးတာကြာလို့ စိတ်ပြေလက်ပျောက်ဖြစ်အောင် စာပြန်ရေးပါလို့ ပြောတာမို့ သူငယ်ချင်းစကားနားထောင်တဲ့အနေနဲ့ မေလ ထဲက ရေးထားတဲ့ အကြောင်းလေးကိုပဲ နည်းနည်းပြန်ပြင်ပြီး တင်လိုက်ပါတယ်။ comment ရေးသွားတဲ့ သူငယ်ချင်းတွေရော၊ အားပေးစကားပြောတဲ့ သူငယ်ချင်းတွေရော ကျေးဇူးအထူးတင်ပါတယ်နော်။

ဇူလိုင် ၄၊ ၂၀၁၀။

May 12, 2010

သမီးဖတ်ဖို့ (၂၀၀၉ ခုနှစ် ဧပြီ - မေလ)

မနှစ်က ဒီလိုအချိန်မှာ သမီးလေး ကိုယ်ဝန်ကို မေမေ လွယ်ထားနေရပြီပေါ့။ ဒါပေမယ့် အဲဒီအချိန်တုန်းက ကိုယ့်ကိုကိုယ် ကိုယ်ဝန်ရှိနေမှန်းတောင် သတိမထားမိခဲ့ပါဘူး။ ဧပြီလ ၂၂ ရက်နေ့မှာ Osaka ကနေ မြန်မာပြည်ပြန်လည်မှာဆိုတော့ ဒီကြားထဲ ခရီးထွက်ဖို့ ပြင်ဆင်၊ ရုံးအလုပ်တွေလည်း လက်စသတ်ပေးနဲ့ အလုပ်ရှုတ်နေခဲ့တာ။ မြန်မာပြည်ပြန်ရောက်တော့လည်း ပါပါးရဲ့ ညီအငယ်ဆုံး မင်္ဂလာဆောင်ရှိလို့ ရန်ကုန်မှာ ၁ ရက်နားပြီး နောက်တစ်နေ့မှာ တောင်ငူကို ခရီးဆက်ခဲ့ရတယ်။ တောင်ငူမှာလည်း အေးအေးဆေးဆေး မနေနိုင်ခဲ့ပါဘူး။ မင်္ဂလာဆောင် ကိစ္စတွေပြီးတာနဲ့ ချက်ချင်းပဲ ရန်ကုန်ကို မေလ ၁ ရက်နေ့ မတိုင်ခင် ပြန်လာရပြန်တယ်လေ။ ဘာလို့လည်း ဆိုတော့ မေလ ၁ ရက်နေ့မှာ မေမေရဲ့ မောင်အငယ်ဆုံး က မင်္ဂလာဆောင် ဦးမှာကိုး။ မင်္ဂလာဆောင်လည်း ပြီးရော အင်းစိန် အန်းကုန်း (မေမေ့ရဲ့ပါပါး) က မေလ ၅ ရက်နေ့မှာ ဆေးရုံတက်ရတာပါပဲ။ မေမေတို့လည်း မင်္ဂလာဆောင် ကိစ္စတွေ၊ အန်းကုန်း ဆေးရုံတက်ရတဲ့ ကိစ္စတွေနဲ့ လူရော စိတ်ပါ ပင်ပန်းခဲ့ကြတယ်။ ရန်ကုန်မှာ နေတဲ့ အချိန်အတွင်းဘယ်မှလည်း မသွားနိုင်ခဲ့သလို ဘာမှလည်း ထူးထူးခြားခြား မလုပ်ဖြစ်ပဲ အန်းကုန်း ဆေးရုံတက်တဲ့ ဗဟိုစည် အထူးကု ဆေးခန်းမှာပဲ ပါပါးနဲ့မေမေက နေ့ဘက် လူနာစောင့်ပေးခဲ့ရတာပေါ့။

ဒီလိုနဲ့ Osaka ကို ပြန်ရဖို့ ရက်က တဖြည်းဖြည်းနီးလာတယ်။ မပြန်ခင် ပါပါးနဲ့ မေမေလည်း ရွှေတိဂုံဘုရား သွားမယ်လို့ စိတ်ကူးထားကြတယ်။ ဘုရားသွားမယ့်နေ့ (မေလ ၁၂ ရက်) မှာ မနက်စောစောထပြီး ဆီးစစ်ကြည့်လိုက်တော့ သမီးလေး မေမေတို့ဆီရောက်နေပြီဆိုတာ သိလိုက်ရတယ်။ ပါပါးနဲ့မေမေလည်း အံ့သြပြီး ပျော်လည်းပျော်တယ်။ စိတ်ထဲလည်း ကြည်နူးမိတယ်။ ဘုရားမသွားခင်မှာ ကလေးရှိနေပြီဆိုတာ သိရတာမို့ ဘုရားရောက်တော့ ကျန်းမာပြီး ကိုယ်လက်အင်္ဂါစုံလင်တဲ့ သားသမီးရတနာလေး ဖြစ်ဖို့၊ ကလေးကို ချောချောမောမော မွေးဖွားနိုင်ဖို့ ဆုတောင်းခဲ့ကြတယ်။ အင်းစိန် အန်းကုန်း၊ အန်းမတို့အတွက်တော့ သမီးလေးက မြေးဦးလေးမို့ လူကြီးတွေလည်း ပျော်ကြတယ်။ ကြုံတုန်း မေမေတို့ အဖြစ်ကို ပြောရဦးမယ်။ ရီစရာလို့ပြောရမလား၊ အ တယ် နုံတယ်လို့ ပြောရမလား၊ အဖြစ်သည်းတယ်လို့ ပြောရမလားပဲ။ ဖြစ်ပုံက ဒီလို သမီးရေ..မေမေတို့လည်း ကိုယ့်ဘာသာ ဆီးစစ်ထားတာ မသေချာမှာစိုးလို့ ကိုယ်ဝန်ရှိမရှိ ပိုသေချာသွားအောင် ဆရာဝန်နဲ့ ထပ်စစ်ဆေးကြည့်ရင် ကောင်းမယ်ဆိုပြီး စိတ်ကူးမိတယ်။ ဒါနဲ့ပဲ တခြားဆေးခန်းသွားရင်လည်း အချိန်ကုန်မယ့်အတူတူ တလက်စတည်း အင်းစိန် အန်းကုန်းတက်နေတဲ့ ဗဟိုစည် အထူးကု ဆေးခန်းက OG တစ်ယောက်ယောက်ဆီမှာပဲ ပြလိုက်တော့မယ်ပေါ့။ ကိုယ်ဝန်တကယ်ရှိတယ်ဆိုရင်လည်း Osaka ပြန်ရောက်ရင် ဆေးရုံစုံစမ်းရဦးမှာ ဆိုတော့ ဒီကြားထဲ ကိုယ်ဝန်ဆောင်သည်တွေအတွက် သိသင့် သိထိုက်တာလေးတွေ၊ ဆောင်ရန်ရှောင်ရန်လေးတွေ သိထားရအောင် ဆရာဝန်နဲ့ ပြကြည့်လိုက်တာလည်း ပါတယ်။ ရိုးရိုးသာမန် စမ်းသပ်တာလောက်ပဲမို့ သိပ်မကုန်ကျလောက်ဘူးလို့ ထင်မိတာလည်း ပါတာပေါ့။ ရုပ်ရှင်ထဲမှာဆို ဆရာဝန်တွေက မင်းသမီးကို နားကြပ်ကလေးနဲ့ ဟိုထောက် ဒီထောက်လုပ်လိုက်ပြီးရင် ကိုယ်ဝန် ဘယ်နှစ်လ ရှိနေပြီ ဆိုပြီး ပြောတာ မြင်ဖူးတာဆိုတော့ ဒီအထူးကုဆရာဝန်မကြီးလည်း မေမေ့ကို စမ်းသပ်ပြီးရင် ကိုယ်ဝန်ဘယ်နှစ်လ ရှိပြီဆိုတာ လက်တန်းပြောမှာပဲလို့ မေမေတို့က ထင်ထားတာ။ ဒါပေမယ့် မေမေတို့ အထင်နဲ့ တကယ့်လက်တွေ့က တက်တက်စင်အောင် လွဲတယ် သမီးရေ။

ပါပါးနဲ့မေမေ မေလ ၁၃ ရက်နေ့ ညနေမှာ OG ဆရာမကြီးနဲ့ ၀င်တွေ့ဖြစ်တယ်။ တွေ့တော့ ဆရာမကြီးက ထုံးစံအတိုင်း မေးခွန်းတွေ မေးပြီး မေမေ့ဗိုက်ကို စမ်းသပ်ပေးတာပေါ့။ ပြီးတော့ ပါပါးရော မေမေ့ရော သွေးစစ်ခိုင်းတယ်။ မေမေ့ကိုတော့ ultra sound ပါ ရိုက်ခိုင်းပြီး ကိုယ်ဝန်အတွက် သီးသန့် သွေးထပ်စစ်ခိုင်းတယ်။ အသည်း (C ပိုး) နဲ့ HIV ကိုတော့ ပါပါးရော မေမေပါ စစ်ရတယ်။ တခြား စစ်ခိုင်းတာတွေ ရှိသေးတယ် မေမေ မမှတ်မိတော့လို့။ မေမေတို့က ရန်ကုန်ကို အလည် ပြန်လာတာဖြစ်ပြီး မေလ ၁၅ ရက်နေ့မှာ Osaka ကို ပြန်ရမယ်လို့လည်း ဆရာမကြီး ကို ကြိုပြောထားရသေးတယ်။ ကိုယ်ဝန်ရှိတာ သေချာလားလို့ မေးတော့ စစ်ခိုင်းတာတွေ အရင်စစ်ပါဦးလို့ပဲ ပြောတယ်။ ဒါနဲ့ပဲ ဆရာမကြီး စစ်ခိုင်းတာတွေ စစ်ဖို့ အရင်ဆုံး ငွေသွင်းကောင်တာမှာ ငွေသွားသွင်းလိုက်တာ စုစုပေါင်း မြန်မာကျပ်ငွေ ၉ သောင်းကျော်ကျတယ်တဲ့လေ။ ၁ သိန်းပြည့်ဖို့ ၁ ထောင်လားပဲ လိုတော့တာ။ မေမေတို့လည်း ပိုက်ဆံရှင်းတော့ တော်တော်လေး စိတ်လေသွားတယ်။ အဲဒီလောက်ပေးရမယ်လို့လဲ မထင်ထားဘူး။ ပိုက်ဆံမတတ်နိုင်တဲ့သူဆို ဒုက္ခပဲ နော်။ အဲဒီနေ့က ပါသွားသမျှ ပိုက်ဆံ အကုန်ကုန်တာပါပဲ။

ပြီးတော့ ရန်ကုန်မှာ ultra sound ရိုက်တဲ့အတွေ့အကြုံလည်း ပြောရဦးမယ်။ ultra sound ရိုက်ဖို့ သွားတော့ ချက်ချင်း ရိုက်လို့မရပြန်ဘူး။ ultra sound ရိုက်မယ်ဆို ဆီးအိမ်တင်းပြီး ဆီးတအားသွားချင်လာပြီဆိုမှ ရိုက်လို့ရတာတဲ့။ မေမေက မသိဘူးလေ။ မသိတော့ ရေလည်း မသောက်သွားဘူး။ ဆေးခန်းမသွားခင် ဆီးတောင် သွားထားလိုက်သေးတယ်။ ဒါနဲ့ သမီးပါးပါးက အပြင်မှာ ရေသန့် ၂ ဗူး သွားပြေးဝယ်ရတယ်။ ရေသန့် ၂ ဘူးလောက် ကုန်အောင်သောက်ပြီး ဆီးသွားချင်ပြီဆိုမှ ultra sound ရိုက်တာ။ ultra sound ရိုက်ပေးတဲ့ ဆရာဝန်က ကိုယ်ဝန်ရှိမရှိကို သူကြည့်ပေးတာ။ ဟို OG အထူးကု ဆရာဝန်မကြီး ကြည့်ပေးတာ မဟုတ်ဘူး။ ultra sound ရိုက်ပေးတဲ့ ဆရာဝန်ကတော့ မေမေ့ကို ကိုယ်ဝန် ၁ လရှိပြီလို့ပြောလိုက်တယ်။ OG ဆရာမကြီး ဖတ်ဖို့ ဆေးစာလည်း ရေးပေးလိုက်တယ်။ နောက်တစ်နေ့ မေလ ၁၄ ရက်နေ့မှာ OG ဆရာမကြီးနဲ့ ထပ်တွေ့ရတယ်။ သွေးစစ်ထားတဲ့ အဖြေတွေကလည်း အားလုံးကောင်းတယ်တဲ့။ မေမေ့ကိုတော့ ကိုယ်ဝန်ဆောင် အားဆေးနဲ့ folic acid သောက်ခိုင်းလိုက်တယ်။ အသည်းနဲ့ပတ်သက်တဲ့ ကာကွယ်ဆေးတွေလည်း ထိုးဖို့ပြောသေးတယ်။ နောက်တနေ့မှာ Osaka ကို ပြန်လာမှာမို့ ဘာကာကွယ်ဆေးမှ မထိုးနိုင်တော့ဘူး။ မေမေတို့မှာ ကိုယ်ဝန်ရှိတာ သေချာလားဆိုပြီး သိချင်တာလေးကို ၁ သိန်းလောက် ဘုမသိ ဘမသိ အကုန်ခံလိုက်ရတာ သင်ခန်းစာပေါ့ သမီးရယ်။ ကောင်းတဲ့ဘက်ကတွေးမယ်ဆိုရင် ပါပါးရော မေမေပါ မထင်မှတ်ပဲ ဆေးစစ်ဖြစ်သွားတာပေါ့လေ။

မေလ ၁၅ ရက်နေ့ ည လေယာဉ်နဲ့ ရန်ကုန်က ပြန်လာပြီး ၁၆ ရက်နေ့ မနက်မှာ Osaka ကို ပြန်ရောက်ပါတယ်။ အပြန်မှာ သမီးပါပါးက ရှိသမျှ အထုပ်အပိုးတွေ အားလုံး သူပဲ သယ်ပြီး မေမေကတော့ ကျောပိုးအိတ်သေးသေးလေး တစ်လုံးပဲ သယ်ခဲ့ရတယ်။ ဗိုက်ထဲမှာ ကလေးရှိနေပြီ ဆိုတော့ နေရ ထိုင်ရတာ အရင်လို စိတ် မလွတ်လပ်တော့ဘူး။ ကလေးတခုခု ဖြစ်သွားမှာကိုပဲ စိုးရိမ်နေခဲ့ရတယ်။ Osaka ပြန်ရောက်တော့ ခရီးပန်းတာနဲ့ လေယာဉ်အကြာကြီး စီးရတာကြောင့် ခါးနာတာကလွဲရင် ကျန်တာတွေ မဖြစ်ခဲ့ပါဘူး။ ဒါဟာ သမီးလေး နဲ့ မေမေတို့ရဲ့ ဘ၀အစ ပဲပေါ့။

မေ ၁၂၊ ၂၀၁၀။